台語文~~~~~趣味的曆法~~~~~遊子
人類自早以來所用的曆法，攏是按照日、月、星辰的走行運行，來推算歲時的方法‧
主要有：陽曆(Solar calendar)、陰曆(Lunar calendar)、陽陰曆等3種；陽曆
是以地球徙日頭來做為計算標準；陰曆是以月娘徙地球來做為計算標準；陽陰曆是配
日頭佮月娘的運行做為計算標準‧
佇台灣陽曆嘛叫做新曆，1年是365工，大月有31工，小月是30工；每4年一輪，有1
年是366工，叫做潤年(Leap year)，加出來的1工，固定佇2月份，所以，有2月29
日；其他3年，每年攏是365工，叫做平年(Common year)，2月干哪有28日‧另外，
用英國的格林威治時間來推算，每幾年嘛會出現1擺潤秒(Leap second)，佇迄年增
加1秒爾爾‧
陰曆嘛叫做舊曆抑是農曆(Farmer’s calendar) ，1年是355工，大月有30工，小
月是29工‧每4年會拄到1擺潤月(Leap month)，就是每4年時，有1年會增加1個月，
即個月是囥佇年頭、年中抑是年尾？就無一定啦，愛看節氣按怎行才來決定‧
因為新曆和舊曆的算法無共款，每年、每月的工數嘛無共款，不過，毋管按怎，每19
年會出現1擺新曆和舊曆的日子是共1工的情形喔！是毋是真趣味？
華人世界的天干地支是60年算做1甲子‧天干是：甲、乙、丙、丁、戊、己、庚、辛、
壬、癸‧地支是：子、丑、寅、卯、辰、巳、午、未、申、酉、戌、亥‧
西洋人講的1世紀(Centenary)是100年‧1季是3個月，所以，1年有4季，春、夏、秋
、冬；不過，北半球和南半球的4季是顛倒反的喔！
舊曆的節氣對照北半球4季的遷徙變化嘛真準喔！24個節氣是：立春、雨水、驚蟄、春
分、清明、穀雨、立夏、小滿、芒種、夏至、小暑、大暑、立秋、處暑、白露、秋分、
露寒、降霜、立冬、小雪、大雪、冬至、小寒、大寒‧俗語講：春分、秋分，日夜對分
；表示日頭直射赤道‧夏至(夏節)日頭上長，表示日頭直射北迴歸線；冬至(冬節) 日
頭上短，暗時上長，表示日頭直射南迴歸線‧攏嘛真合理啊！節氣嘛分大細喔！身體欠
安的人，拄到大節氣愛搁卡小心細膩才是，毋通鐵齒啊！
註：(1).貼出來的月娘相片是頂個月的月偏蝕情形‧看有無？正爿下跤缺1角
(2).即篇嘛拄好是烏白寫的第200篇啦！
留言列表
