jimmycmlin的部落格

台語文~~~~~台語中有性別歧視的俗諺~~~~~遊子
由傳統習俗中對性別歧視的調查，其中以“不得入族譜”，是所有查某人上怨歎、
心疼和無法度忍受的‧無論已婚的抑是未婚的查某人的名字，攏﹝勿會﹞當寫入族
譜‧其他亦有：未婚查某人往生後，干哪會當入姑娘廟；查某囝結婚出嫁時，外家
愛向外頭潑水；已經結婚的查某囝，﹝勿會﹞當佇正月初一倒轉去外家茨；親人過
身時，干哪會當由查埔的捧斗、執幡、主祭；頭胎生查某囝時，月內﹝勿會﹞當食
麵線；生查埔囡仔是弄璋誌喜，生查某囡仔就叫做弄瓦；查某囝結婚出嫁時，愛過
火爐、踏瓦片、向車外hiat扇仔；生查埔囡仔時送油飯，生查某囡仔時送雞卵糕﹝
即馬是無一定啦！﹞；拄到生理期時，﹝勿會﹞當去寺廟舉香拜拜等等‧
zia的傳統習俗攏是以男性沙文主義的思想和環境造成的，時代一直佇演變改進，
前仔講到的傳統習俗，大部份嘛攏無合即馬的時代囉！是有需要改善抑是去除‧尤
其男女平權的思想教育，愛自細漢時就教育起，佇茨內、學校內、社會生活中，攏
愛落實改善，才是正確的移風易俗方式‧
佇諺語中嘛存有真濟重男輕女的講法，親像：
查某囡仔是外頭家神仔；死查埔倒1房，死查某死1人；1叢肉豆，卡好3個查某囡仔
；男無妻，家無主，女無夫，身無主；有父有母初一二，無父無母初三四；查某人
三世無茨；生後生，月內禮排佇眠床頭；大家有喙，新婦無喙；男人趁，女人理；
男命無假，女命無真；查某囡仔人，乞食工藝嘛著學；查某囡仔人，油麻菜子命；
查某囝得嫁妝，查埔囝得田園；查某囝飼大別人的；查某人放尿漩﹝勿會﹞上壁；
愛生查某囝，才有人哭跤尾等等‧
時代一直佇進步，咱嘛愛隨時來調整，才會當互咱的家庭生活美滿，社會和諧，創
造搁卡媠的未來‧