jimmycmlin的部落格

台語文~~~~~北越6工旅遊感(5)~~~~~遊子 2009.11.18.
越南是目前全世界少數的共產國家之一，毋過，自美越戰爭後南北越統一，
亦開始開放發展經濟，佇東南亞的國家算是進步真緊的國家；土地329560
平方公里，人口數8611萬外人，排全世界第14名，首都是河內Ha Noi，
上大都市胡志明市Ho Chi Minh City，美越戰爭前叫做西貢Saigon，
主要語言越南語，以羅馬字母拼音寫文字，宗教信仰有天主教、佛教佮高臺
教，目前平均國民所得差不多是美金835箍(1箍美金換18000越南盾)；國
土親像S的長條形，美越戰爭前以中部順化為界，分為南越佮北越，北越屬
亞熱帶氣候，南越屬熱帶氣候，總共有54個民族，以越族(亦叫京族)佔8成
7上濟，漢族是少數民族內上大的族群佔1.5%，過半的漢族人蹛佇胡志明市
，其他較有名的少數民族有：苗族、岱族、傣族、芒族、儂族等等，大部份
攏生活佇高山地區‧

越南受中國文化影響超過1千年，古早用漢字佮喃字來做標記寫文章，佇博
物館內有看到全部漢字的古冊，親像佇日本北海道博物館亦有看到全部漢字
的公文書，自19世紀予法國人統治百外年，到今留下3項上大的影響：文字
完全改為羅馬字母拼音系統，法國式的建築物，法國麵包佮咖啡‧所以，統
治者的強制干涉，對文字文化的影響非常大啊！對台語文字文化的傳承來講
是真正大的警覺啊！

首都河內Ha Noi，人口有300萬人，市內建設攏留下法國人的跤跡，參有
東西方的藝術，生活水準佮社會活動情況，親像咱台灣40年前的款，交通真
亂，汽車、客運、大小遊覽車、計程車、觀光的三輪車、烏都[禾黑]、腳踏
車等等，互相爭路無相讓，比雄比敢，滿路攏嘛聽到喇叭無停的叭叭叫！路
仔的人行路愛真細膩才會用哩！欲過大路路口，上好相招做伙過，愈濟人愈
助膽，喝行同齊做伙衝過去，抑無，孤單1個人企規埔嘛無法度徙跤步啦！
實在恐怖‧

路邊電火柱子的電線予人看到嘛真趣味佮好奇，一絿一絿，大細絿攏有，一
絿有幾仔百條電線，上無亦有幾仔十條電線結做火，如果跳電欲檢查修理，
毋知欲由叨位揣起啊？規個市區的天頂親像予網子罩著的感覺，夯頭一定看
到電線絿啦！

百姓交通工具以烏都[禾黑]、腳踏車為主，烏都[禾黑]價數無俗，125CC的
新型烏都[禾黑]大約25萬盾，合咱新台幣5萬箍，三陽佮光陽的烏都[禾黑]
看起來袂少，早期去設廠投資有趁錢；私人汽車以日本豐田Toyota佮韓國現
代Hyuntai的車較濟，毋過車型較退時，計程車是以韓國現代Hyuntai的
1500CCGetz佔大多數，亦有1000CC的做計程車；市區公車無冷氣，坐的
人嘛無濟‧

市區的新大樓漸漸佇起起來，4粒星、5粒星的新飯店為主，整齊較新淺黃色
的建築物一定是公家機關，政府辦公、學校等等，一般民家茨攏是3公尺闊10
公尺長的長條形，扣稅就依茨的闊度來計算，上鬧熱的36條舊街，大部份是3
層樓以下較濟，塗粉仔濟，看到舊舊仔，市容建設來講，差南部的胡志明市一
大節‧首都就是按呢！其他的城鎮閣較免講啦！

市區只有1間4層樓的百貨公司，店員比人客較濟，店員又閣無笑面，物件嘛
無濟，看起來應該是國營的，上頂層有超級市場，可能是河內唯一的超級市
場，因為佇徙街時，只看到傳統市場爾爾，其他看無半間超級市場，無像佇
胡志明市，超級市場亦有袂少間，大飯店附近就有喔！
料理來講，庶民經濟上普遍的就是：河粉、潤餅、法國麵包佮咖啡‧尤其對
外客來講河粉佮潤餅上出名，河粉有乾的、湯的、油的、清的；潤餅有炸(
tsi3) 的、炊的；每工3頓攏有機會食到‧其實法國料理佇越南算是高等料
理喔！只是銀兩愛開較濟啦！在地風味餐，芳料種類濟，只驚外客無一定會
接受，毋過，有機會試看mai7亦是袂[禾黑]啊！

越南的義務教育到高中，毋過，真濟家庭的囡仔佇初中畢業就入社會趁錢啦！
其實lam2-lam2-馬嘛有1步踢，越南社會登佇發展，學師仔功，有1種手藝
在身，免驚趁無食，[人因]的少年人看起來嘛真拍拼，像阮團的導遊是1973
年生的，大學未畢業就已經兼差趁錢，做導遊已經幾仔年，1個月才轉茨1擺，
伊的牽手做高中老師，2人同齊為家拍拼，是真標準的少年翁某對‧像咱台灣
這幾年來，大學畢業生塞倒街，起薪一直落，亦有佇公園[扌去]狗屎，猶原
真濟大學生揣無頭路，悽慘的情形繼續而有加無減，咱的政府毋知有看到無？
有辦法解決無？(待續)