台語七字仔詩~~公會旅遊記－jimmycmlin的部落格

台語七字仔詩~~~~~公會旅遊記~~~~~遊子
青天白雲風微微，出外佚佗好時機；(微bi;佚佗thit tho)
康樂主委大手揮，十台大車同齊開‧
會員眷屬來參與，男女老幼囡仔庀；(庀phi)
透早未光就爬起，逐車出發攏準時‧

石崗水壩頭一站，隨人騎車去遊覽；
東豐綠廊鐵馬道，宜人景緻復璀璨‧(復koh; 璀璨tshui tsham)

九二一地動園區，災情重大筆難書；
橋斷路崩歹運輸，災後重建激腦思‧

大自然力大無比，絕對毋通將伊欺；
濫墾土地破壞天，激怒受氣造成悲‧

通霄鹽山白蒼蒼，爬上頂面四界望；
發電風車企懸昂，海岸嫷景入眼藏‧(企懸昂khia kuan gang)

用餐開席四十桌，菜色滂湃營養多；(滂湃phung phai)
幹部敬酒像水波，食飽飲醉免煩惱‧(飲lim)

車內拼歌互相催，台華日語參著推；
歡樂時間無浪費，歡喜出門平安歸。