台語文~~北越6工旅遊感(完結萹附領隊所拍影片)－jimmycmlin的部落格

台語文~~~~~北越6工旅遊感(完結萹附領隊所拍影片)~~~~~遊子 2009.11.20.
飛機到河內機場時，領隊交代大家佇入境表簽名，無若久隨有穿制服的
阿兵哥過來，態度無講真好，喝講袂使踮遮停留，叫阮緊行出關‧一時
予大家醒來講：到底是共產國家啊！好佳載，出關算是順序啦！

頭1工就去參觀河內上大的民族文化博物館，需要買門票，欲翕相亦是
拍影片的人，要求另外買票，抑無，相機愛收起來，總是步步愛錢啦！
博物館展出[人因]的傳統民俗生活上的物件，食的、穿的、蹛的、交通
的、娛樂的、宗教信仰的、手工藝術品等等，茨挺懸的高跤茨，佮東南
亞其他國家的茨共款；用樹皮、動物皮所做的衫仔褲，彩色的服裝；做
穡的逐種傢私頭仔，宗教信仰祭拜的儀式等等，佮咱台灣的原住民、早
期移民來台灣的漢人無什麼精差‧嘛有真濟漢字的文化作品，亦有全部
是漢字的古冊，表示受中國千外年的影響真深，閣表現出越南54個民族
的多元文化‧

河內建城一千年囉！古早舊名叫做昇龍城，自古就是李朝的首都，美越
戰爭結束後，猶原是越南的首都，36古街自早就非常鬧熱，到今亦是觀
光客上去愛踅街的所在，伊的特色是規條街仔路攏是賣共款物件的店仔
，簡單講就是激市啦！雖然，時代改變，部份新的物件會就市，綴未到
時代的物件會就無去，基本上應該無講差真濟‧山賊版的物件亦袂少，
有1款上機箱差不多美金30箍，是正港的1成爾爾，領隊Terry San先
買1個，大家愈看愈甲意，上尾工閣來36古街時，總共拜託Terry San
替阮買6個，佇機場7個排做伙，袂[禾黑]看喔！

水上柴翁仔(華語講木偶)表演是越南國寶級的傳統藝術，親像咱台灣的
布袋戲，捷克星光劇場的傀儡戲，是真受歡迎，觀光客亦一定會買票去
欣賞，尾仔暗阮嘛入去看，雖然，用英語佮越南語紹介說明，親像鴨子
聽雷，毋過，入口有10外國文字的劇情概要，所表演的劇情大概嘛看有
啦！雖然，欲翕相共款愛令另外開錢，佇表演中間，閃光無停，真濟人
掠著鏡頭認真翕，實在講有價值啦！

上尾工參觀越南的國父胡志明紀念館佮伊的故居，紀念館是瞻仰伊的遺
體，戒備非常嚴，差不多是空手進入參觀，什麼攏袂當紮入，去親像欲
入慈湖共款；伊的故居表面看來純樸的環境佮簡單的家具，親像咱台灣
逐所在的蔣介石行館，毋過，越南的百姓是真正尊敬伊，伊亦奉獻予越
南的百姓，帶領越南打敗法國、中國、高棉、美國，規世人是獨身無娶
，所以，越南的百姓講越南的國旗只有1粒大星，就是代表胡志明；無
親像中國的國旗，有1粒大星以外，邊仔綴4粒小星，表示毛澤東的感
情生佸，佮胡志明是完全無共喔！

佇6工的行程中，印象一直真好，毋過，欲轉台灣時，佇河內內排機場
的賣店，發現刁工找毋對錢的攤仔位，攏差不多搶對倍，10箍美金的物
件變成20箍的情形，共一個時間就發生4件，阮亦其中之一，佳載猶未
上飛機，20分鐘後倒轉去理論，2個店員無第2句話，隨還阮10箍美金
；另外1對咱台灣的翁仔某，綴尻川後去討轉來10外箍美金的差額‧想
起來佇國際機場內的烏心藝品店，實在傷雄亦真可惡，大家有機會去河
內內排機場的賣店時，一定愛小心注意啊！

網路上定定看到領隊達人的名詞，出國亦袂少擺，每擺有領隊，毋過，
一直無瞭解領隊達人到底佮一般的領隊有什麼無共？阮這擺標示由領隊
達人Terry San tshuah8隊，出發前1工先電話交代愛注意的代誌，
毋是本人接電話時，伊講話應對真細膩，預防造成意外風波，這是頭1
點無共的所在；伊堤早到機場，將双双對對的機內座位調整予做伙，分
行李識別牌時，1位1位喝名後，1件1件大行李為你掛好識別牌；進入
機內，隨個巡看有問題無，尾仔家己才坐落；食飯時，一定攢好麥子酒
佮飲料，亦一定等8菜1湯上齊後，伊才佮導遊去醫腹肚；萬一有人有特
別要求，伊儘量應付甲到，予人滿意；沿路有嫷風氣做背景時，一定替
團員翕相做紀念，無論1人亦是做陣攏無要緊，伊本身是翕相pro專家，
自頭到尾揹翕相的傢私頭仔上山落海，有30公斤喔！[足百][山奇]亦
無輸人，看伊體力有偌好講；沿路亦欲取好景緻做網路部落(Blog.)的
資料，對團員的服務閣絕對無拍折，而且，毋是虎頭鳥鼠尾喔！自第1工
到上尾工離開桃園機場講再會啦！攏是保持相共的誠意熱情的態度，有
影是頭1擺感受到領隊達人的特別所在，猶有喔！到茨無2工，已經將所
tshuah8團的相片貼上伊的網路部落，先予所有朋友瀏覽分享，續落20
工左右，伊閣會寄旅遊的資料光碟片予每1個團員，攏是品質好高畫素的
相片佮影片‧真正感心啊！

由伊網路部落的人氣非常旺來看，所有綴過伊團的人，攏變成朋友，會
主動預約參加未來的出團，亦會紹介親朋好友來參加，伊亦得過真濟獎，
尤其最近又進入2009第五屆全球華人部落格大賽--商業應用組，初審頭
前20名，進入決賽評審，真有希望提到上頭名喔！咱先來祝福伊！
這位領隊達人Terry San就是雄獅旅行社的陳榮瑞先生。(完結篇)