jimmycmlin的部落格

咱的台灣~~~~~米龍~~~~~~遊子 2009.11.29.
媒體報導：新竹市國家古蹟級的廟寺關帝廟，起廟至今有233年歷史，
最近整修完成來做醮，以米龍來祈福謝土‧什麼是米龍呢？
佇咱台灣的民間傳統信仰中有：安龍送虎佮慶成謝土的祭拜儀式‧一般
是佇建築物起好完成時，對天地感恩祈福的法會儀式‧
佇民間認為新起廟亦是重起整修的動土、動工，攏是對在地龍脈地理的
反動、攪弄，所以，佇新起完成亦是重起整修完成時，一定愛舉辦安龍
送虎佮慶成謝土的祭拜儀式‧重新安頓守護廟基的龍神，接續地脈龍氣
，送走會危害廟寺的虎煞，拜謝土地神明的保庇予工程進行順序；這亦
是表達咱人對大自然生命的尊重，正是”崇德報本”、”飲水思源”、
”食果子拜樹頭”的思想‧
用白米做的米龍表示五穀豐收，銀角仔做鱗片，1片接1片，表示財富黏
黏(年年共音佮共意)，龍跤分別有”旗、球、撠、磐”的圖飾，表示共
音佮共意”祈求吉慶”的意思，祭拜儀式結束了後，會將米龍分送信眾
以分享保庇平安順序‧