jimmycmlin的部落格

台語文~~~~~韓國旅遊[1]~~~~~遊子 20010.08.09.
對韓國的印象是30外年前第1擺出國時留著：入海關管制真嚴，單眼相機、有名的手錶仔、金手指、金鍊子等等，入海關時需要登記，離開欲出海關時需要閣核對，1項嘛袂當無共；當時的金浦機場佮台北松山機場差不多，街仔路的看板攏是韓國字，一點仔漢字亦是英文字攏無，一般英語亦未通，漢江的水有臭味，有寡仔韓戰留落來的飛機、武器做展覽，街仔路看到的攏是韓國車，嘛有日本人起的總統府，佮台北市日本人起的總統府真親像，非常怨恨日本人，禁止講日本話，一般感覺生活水準佮社會建設攏較輸咱台灣‧
最近有機會閣來韓國遊覽看看，予人大驚一下，一踏入仁川機場開始，就隨感覺完全無共款啦！仁川機場是韓國為著佮日本同齊舉辦世界腳球比賽來起的，開通欲10年，頭仔幾年是全世界排頭名，後來一直到今，佮新加坡的樟宜機場，一直攏排全世界前5名喔！仁川機場是起佇仁川市外海的永宗島，規模有夠大，對外有跨海大橋聯絡仁川市，嘛有渡船，機場內有地下電車相通，每3~5分鐘1班車，機場內沿途旅客的動線攏標示有英文佮韓國字，配合圖樣，予旅客非常清楚佮便利；佇出境的區域，除了一般賣店、服務設置以外，亦設有免費予旅客家己動手做韓國的文物，做完順續紮轉去做紀念品，真搭心閣有意思，踮機場內感覺真清爽；看航班表，每點鐘有百外班次飛機起落，是非常無閒的機場，毋過，予人感覺真正好‧對著咱桃園機場，實在見笑，完全無進步啦！
入到韓國的首都Seoul，以前叫做漢城，幾年前改名為首爾，表示韓國人對漢字研究真深，[人因]的首都Seoul並毋是”漢之城”，所以，改變為”爾之首”，叫做”首爾”，由此可知，韓國人毋哪怨恨日本人，亦排斥中國的文化，才會家己創造諺文字，完全排除漢字，雖然，佇博物館、風景區內猶原有真濟漢字的文物，he攏是古早留落來的‧亦有30外年前有看到日本人起的總統府建築物，韓國人認為he是對全體韓國人的一種恥辱，無面子的圖騰，看到心內就鬱積，所以，全國同意將伊拆掉，另外揣所在重起總統府，就是現此時外頭廣場開放觀光遊覽的青瓦台，由遮會當看出韓國人對日本人的怨恨有偌仔深‧相對咱台灣人對日本人是有親切感無怨恨，這就是民族性的無共，韓國人強勢、團結、硬拄硬，台灣人講好聽是溫純，其實由歷史看是放尿攪沙未結堆，才會予外來族群來軟土深掘佮分化啦！
佇韓國5工，鼻孔未污，衫仔領未污，表示空氣是清氣的，由西海岸走3~4佰公里遠到東岸海，無論都市亦是庄腳，空氣攏是清氣的，就親像咱宜蘭、花蓮佮台東‧看到咱台灣大埔事件佮逐所在予政府強迫徵地的事件，看到咱的政府到今猶只照顧大企業爾爾，亦是犧牲社會成本來發展經濟，繼續好到企業家，予好額人愈好額，予一般百姓歹趁食，空氣繼續污染、水源溪水繼續污染、田園土地繼續污染等等，結果，韓國的平均國民所得，原本排佇台灣後壁，這2~3年來顛倒超過台灣囉！予人真疼心兼凊心啦！
咱台灣人真正愛緊覺醒，毋哪欲拼過韓國，閣較是為咱的囝孫來保護咱的土地，顧好咱台灣的主權才是！