jimmycmlin的部落格

台語文~~~~~配目鏡~~~~~遊子
“88節”的關係，查某囝問我需要什麼禮物，實在講亦無欠什麼物件，這
幾年來感覺毋管什節日，攏是互做生理人創甲完全商業化去啦！顛倒失去
本來節日的意義啦！不過，序細的好意和孝心，想來想去，想講舊的目鏡
嘛掛真久囉，有時陣掛歸工，是有淡薄仔卡重的款，鼻仔頂凹入2跡痕影，
一直想講來換一支仔卡輕可仔，嘛一直毋甘開錢換，拖仔拖，嘛一工過了
一工，猶原甲舊的掛﹝止周﹞﹝止周﹞，這擺心頭掠互橫，好啦！決定來
換一支仔新的卡輕可仔的來享受著‧
查某囝陪我去目鏡店驗度數、選鏡框、選鏡仁，本來想講來換著卡無共款
的型，看起來卡少年款，不過，在店長詳細解說無框、半框、全框的優點
和缺點的比較了後，LKK的本性就現出來，想到一支目鏡是擋久久的，抑
是選卡耐用的卡實在，綴流行是親像一陣風爾爾，無框的隨放棄啦！半框
、全框嘛想歸晡久，上煞尾嘛是選耐用的卡要緊，安呢恁就知影我選叨一
款啦！
才無若久以前爾爾，攏是我帶﹝人因﹞去買逐項物件，親像：學校的制服
、參考冊、考試單仔、果子糖仔餅仔、配目鏡、補習班上、下課的接送、
去遊樂場、看電影等等，想﹝勿會﹞到即馬換﹝人因﹞來陪我去配目鏡，
陪媽咪去踅街仔路、踅百貨公司；有影互囝仔追到老阿啦！