台語文~~~~~韓國旅遊[2]~~~~~遊子 2010.08.14.
拍電影、電視劇來帶動觀光的人潮，親像咱台灣2年前的”海角7號”佮舊年的”艋舺”，分別予恆春佮台北市萬華區的遊客增加非常濟，只是真可惜，親像一陣風吹過爾爾，過不偌久就冷去啦！
佇韓國這幾年來，因為韓國政府的大力獎勵，予韓國的電視劇毋哪佇[人因]國內真搶市，佇日本、台灣、中國亦真時行，真受歡迎，毋哪觀眾濟，fans追隨者真熱情，予演員變成大名星，紅透天，趁錢裝未離‧拍片的所在亦變成觀光遊覽區，只是韓國政府有計劃推動佮維持，予遊客保持繼續增加，一直到久長，這真正是咱愛好好仔學的精神佮態度‧
“冬季戀歌”~裴勇俊主演，電視劇的風行，予拍片的南怡島[NAMINARA]佮春川明洞[明洞就是咱所講的商圈、鬧熱區]，正式排入遊覽的行程內‧南怡島是位佇漢江中段的小島，原本以小艇來往為渡船，因為遊客增加真緊，附近商家收入增加，改為2台大遊艇做渡船，每8~10分鐘對開，歇睏日時碼頭邊遊客共款排列真正長‧大遊艇双爿掛有逐國遊客的國旗，看來親像是聯合國的船哩！咱台灣的國旗佮中國的國旗，隨人企一爿，嘛表示咱台灣人亦來未少‧
渡江時間5分鐘爾爾，漢江的水真清氣，登岸上南怡島，杉仔林懸懸懸、直直直，有幾仔排，佇”冬季戀歌”的劇情拍出來非常嫷，亦是遊客上欲翕像留念的景色之一，島上有電動遊覽車、腳踏車、双座腳踏車、單人電動腳踏車、三輪車等等，予遊客選擇真方便‧其實島的面積無大，頭尾往回免點半鐘，寬寬仔行，雖然共款是35度，感覺比台灣較未熱，可能溼氣較輕的關係；大石頭有漢字佮諺文同齊雕刻的詩句，亦有看到古早韓國人做包子的場所佮傢私頭仔，嘛有中國式亭台花園的造景，真濟韓國式雕刻的大細個石頭翁仔佮圖騰柱子，亦有幾叢仔楓仔搶頭返紅，佇青翠的樹林內較刺目，韓國的熱天只有7~8月2個月爾爾，下個月起是滿園紅絳絳，是賞紅葉的季節啦！
看過江面，有快艇扭著空氣艇仔，佇水面拖著行，亦有拖著飛行傘，飄浮佇半天中，看到真刺激‧看到双爿碼頭區遊客的長龍，上船落船，渡船來來去去無通歇，會當看出遊客有偌仔濟‧
續落來到春川明洞[CHUNCHEON MYEONGDONG]食中晝，這亦是“冬季戀歌”拍片的所在，看來蹛遮的人無濟，顛倒是遊客較濟，街仔路攏有掛“冬季戀歌”~裴勇俊佮女主角的看板，稍可仔親像台中市的精明街鬧熱區；遮上出名是春川鐵板雞[DAKGALBI]，有1條春川鐵板雞[DAKGALBI Street]，親像佇北海道的札幌[SAPPORO]有1條拉麵街共款，規條街仔幾仔10間攏是做鐵板雞的店面，設備、料理看起來亦攏差不多，毋過，就是有1半間仔人氣特別旺，排隊排到外口陸邊喔！這嘛佮咱台灣淡薄仔親像，同行聚市是濟戲濟人看，人氣旺無隨人看功夫啦！
鐵板雞的料理是4個人1桌，1鼎平面大鐵板，高麗菜、韓國的年糕條仔、雞肉塊佮馦椒仔醬做伙炒，看來其實嘛簡單簡單，鼎中央撥開囥白飯做炒飯；食的時用青菜、大葉紫蘇來包著雞肉食同齊入喙內，口味是無共的，這是韓國式的食法，會當試看無共國家的飲食文化，嘛是出國旅遊時難得的體驗啦！
全站熱搜
留言列表
