jimmycmlin的部落格

新聞辭典~~~~~血腦屏障BBB~~~~~遊子 2010.08.12.
媒體報導：咱台灣的長庚病院佮長庚大學合作，研究出突破血腦屏障的藥物運送系統，予腦瘤患者揣到新的治療法----。什麼是血腦屏障？
血腦屏障佇英語叫做Blood-Brain Barrier;縮寫為BBB，因為大腦會使講是咱身體的主機板，為著保護這個上重要的中心器官組織，佇頭殼內的腦部血筋，自然發展出特別的血腦屏障BBB，親像1個保護過濾的關口，除了營養物質以外，其他只有非常少數的化學物質才會當順利進入咱的腦部，一般細菌亦無法度侵入，除非血腦屏障受損害時‧
佇19世紀時的研究人員就觀察到血腦屏障的存在，毋過，一直到掃瞄式的電子顯微鏡予人用來做醫學研究時，這層神秘的血腦屏障關口才予人正式發現到；除了腦部的毛細血筋的內皮細胞間，互相銜接著比一般的血筋內皮細胞閣較密，空縫閣較細，另外猶有2層的防護機關‧
血腦屏障BBB除了氧氣、二氧化碳佮血糖以外，其他的物質差不多攏無法度通過進入腦部，大部份的藥物佮卵白質因為分子結構真大，完全無法度通過進入，一般細菌病源亦閣較免講‧
毋過，一旦咱身體有過恙得到病症，親像：腦瘤、腦膜炎---‧欲治療的藥物亦真無簡單進入腦部來治療，一般只有千分之一的機會爾耳，因為任何物件有1好就無2好阿！
即馬，研究出突破血腦屏障的藥物運送系統，予腦瘤患者揣到新的治療法，雖然，可能愛4~5年後才有機會正式使用，對腦瘤患者來講，欲完全治療有希望囉！