jimmycmlin的部落格

新聞辭典~~~~~光動能[Eco-Drive / Tough Solar]~~~~~遊子 2010.07.26.
佇媒體看到手錶的廣告”光動能優雅手錶”，咱知影自早到今的手錶，由機械式、石英式、電池式等等，毋知什麼是光動能式？
自石油危機發生以後，續落來全球溫度暖化，保護環境意識夯頭，綠色能源產業科技當時行，利用大自然的力量來生產咱日常生活需要的能源，所以，利用風力、水力、海湧、日頭光、豬屎、牛屎等等，看名知意，光動能應該是佮光線有關係啦！
光動能[Eco-Drive / Tough Solar]強調上環保，免換電池‧光動能是利用光能轉變成電能，閣會當將電能儲存起來，來予手錶會使順序正常運轉的1種先進高科技技術‧以光能轉變成電能，取代一般所用的水銀電池，所以，攏毋免換電池‧
光動能的設計原理是佇手錶面板下面，裝置1片會使將光能轉變成電能的”太陽能面板”，閣將電能儲存佇”2次電池”內，提供予手錶會使順序正常運轉的動力來源‧只要有光源，無論強弱，就會當生產佮儲存電能，抑準佇無光源的環境，”2次電池”猶原會使自動提供運轉的動力！運用上自然的光源來充電，光能轉變成電能閣變成動力，是佇一目[目聶]的時間就完成喔！