jimmycmlin的部落格

台語文數位文化~~~~~學習閩南語以部落為師~~~~~陳琬婷作/遊子譯2010.07.25.
你想講：聖誕歌曲”Jingle Bells”的閩南語版是”金勾貝,、金勾貝”按呢唱是喔！抑是真正按呢唱，你就錯啦！咱來去”遊子的網路日誌”[網路日誌佇英文是Blog，華語叫做部落格，台語叫做部落.]，予遊子來教你講按怎唱才對‧
”遊子的網路日誌”佇2005年2月開張，大部份的文章攏是以台語文來寫作‧遊子講：現此時是1個多元語言的環境，英文猶原會繼續強勢，華文亦開始欲竄起來；閩南語雖然只是限佇台灣、中國福建、廣東佮東南亞等所在較普遍使用，毋過，估計上少猶有6、7千萬人，嘛排名佇全世界前20名，所以，如果無繼續推廣，就會予閩南語消失拍無去，是非常可惜的代誌‧
政府有舉辦鄉土語言教學支援人員認證，已經通過閩南語認證的遊子，就此踏入閩南語教學領域‧除了佇國小做志工教學，亦佇網路世界內建立部落，分享家己的台語文創作，包括：散文、詩詞、心得、雜感等等‧
伊亦翻譯報章雜誌上的新知識，以台語文紹介予讀者，親像：G20、MOD、WiFi等等‧遊子表示：1個語言毋是只限定佇某幾個領域爾爾‧所以，才會用台語文分享無共領域的新知識‧文章內容涵蓋著多元範圍，除了財經、文化、文學、地理、法律、科學、3C，醫療保健佔閣較大多數，因為遊子的本業就是1位藥師，以家己保健的知識佮台語文結合，提醒民眾注意醫藥保健，親像：塵肺症、諾羅病毒等等‧
部落內上受人歡迎佮影目的是：每年聖誕節欲到時，遊子攏會貼上聖誕歌曲”Jingle Bells”的閩南語版”歡喜聖誕節”[王金選先生作詞]‧遊子講：貼上這首歌的頭1年，上濟時1工就有3千外人來瀏覽；嘛有真濟網友會向遊子要求寄MP3的音樂檔，有蹛佇海外的台灣人，藉著這首歌來解思故鄉之情，亦有學校老師想欲利用這首歌來做教材，閣較有精神治療師想欲透過這首歌來治療患者‧除了聖誕節，遊子亦會依據無共的節慶，貼上無共應景的台語歌謠‧
讀者郁文表示：遊子定定貼上台語文相關的知識佮資訊，予民眾對母語文化有閣較深一層的瞭解‧讀者游輝清講：遊子對台語的熱情佮用心記錄，予人敬佩‧
台語文用字無統一，是遊子寫作部落時遇到上大的困難，有人主張台語文應該全用漢字來寫，抑是，全用羅馬字來寫，抑是，漢字佮羅馬字並用來寫‧遊子較甲意漢羅並用，伊講：既然有漢字通用，為什麼要全用羅馬字？抑是，遇到外來語、擬聲詞時，才使用羅馬字就可以啦！用字無統一，較會變成你寫你的，我寫我的‧進前教育部公布閩南語常用字詞300個，遊子表示：300個無夠用，上少要兩千個才有夠用‧
對未來的發展佮期待，遊子希望政府應該繼續重視母語教育，1個國家1個地區，多種語言同齊存在較好，現此時官方語言用華語，毋過，母語亦毋通予伊消失去啊！而且，亦希望家己有閣較濟的時間，好好仔經營家己的部落，會使提供閣較濟閩南語的資訊予民眾‧伊笑講：個人的力量無濟啦！會當做偌濟算偌濟。
[2009年8月初6.陳琬婷以華文寫作.發表佇生命在愛心中萌芽.生命力新聞作品選集]
[2010年5月.輔仁大學新聞傳播學系印行出版]
[2010年7月25日.遊子譯]