jimmycmlin的部落格

新聞辭典~~~~~披披亦福PPF~~~~~遊子 2010.07.02.
媒體報導：某醫學中心採用以醫生的業績來計算薪水，以開放式系統[Open System]的經營方式，攏會實施”披披亦福”[PPF:Proportional Physician Fee]制度，華語翻譯為指定醫師費制度‧
什麼是”披披亦福PPF”制度？
古早佇公、勞保時陣，大病院的門診定定客滿掛無號，有寡仔病院會推出患者只要加錢來掛號，就一定有法度佇當日予患者指定的醫生來看病，抑無，掛無號可能走白工，另日才閣來掛號，所以，加淡薄仔錢會當省工，緊看病提藥仔，亦算會合啦！
需要開刀時亦是共款照排隊，大牌的主治醫師、教授等等，定定患者濟，無法度分身，會安排予少年的醫生來動手開刀；毋過，患者抑準加錢來指定欲與某某大
牌的主治醫師、教授親身動手開刀，就一定無問題，只是價數看大小手術無共，有時陣，毋是一般人負擔會起‧
查某人欲生產生囡仔，無論自然生產亦是剖腹生產，嘛是攏有”披披亦福PPF”制度；有時陣，囡仔頭已經將欲出來囉，指定的醫師、教授有可能無閒，猶趕未赴，只要順序生產，指定醫師費亦是愛照付；毋過，如果無順序生產，指定的醫師、教授就需要負相關的責任‧所以，指定醫師費對醫生來講，亦是無好趁啦！
”披披亦福PPF”制度亦會當講是醫生的收入以算件的啦！依據醫生個人的門診數量、患者蹛院、患者檢查等醫療服務量，以定額亦是定率方式來抽成、計算收入，看病院佮醫生的約束規定‧
亦有寡仔病院為了避免新來醫生的患者少月給傷低，資深醫生的服務工作量傷大，除了訂出”披披亦福PPF”上懸的限度以外，亦會設公積金制度，超過上懸限度的部份，就轉入公積金內，予任何院內醫生依據規定來申請使用，包括：出國進修輔助、教學研究輔助、子女教育輔助等等‧
一般認為”披披亦福PPF”會予醫生的服務態度較好，拍拼工作、提高效率，做好醫病關係；毋過，亦有人認為會變成服務好額人，普遍的醫療品質會降低；亦有人認為醫生會揀好處理、付費濟的患者，較麻煩、較困難、較無把握的病患就無欲收！抑準真正是按呢，就變成醫療災難囉！