用藥保健~~~~~咱做伙來檢收廢棄藥物~~~~~遊子 2010.07.11.
衛生署食品藥物管理局[TFDA]佇今年7月份推出廢棄藥物檢收總動員的活動，由全國24縣市藥師公會來主辦，總共有1500間社區的藥師藥局來執行，希望咱全民來愛家愛台灣，同齊來做好檢收廢棄藥物的工課‧
為什麼需要來做好檢收廢棄藥物的工課？
因為如果過期亦是囥久無用的藥物，稱採來沖入茨內馬桶、水槽仔亦是攏無處理來埋入土裡，有可能會慢慢仔滲入地下水、流入河川溪水，造成生態的改變，對咱人的影響真正大‧已經有專家報告講：因為公的魚仔食著河川溪水內殘留的女性賀爾蒙，無法度生產正常精子，變成生產出親像母的卵細胞組織‧
台大環工研究所佇研究咱台灣的河川時發現：台灣某1條河川內紅黴素的檢出量是德國的1500倍，加拿大的900外倍，實在驚死人啊！
所以，胡亂tan3掉廢棄藥物，會污染咱的生活環境，嚴重影響到生態佮健康‧
按怎來配合廢棄藥物檢收的推展呢？1步1步來：
[1].任何藥品絕對毋通倒入茨內馬桶、水槽仔來沖走‧
[2].收集茨內過期亦是囥久無用的藥物，先將藥袋仔面頂個人資料清掉，留著原本的包裝‧
[3].由2010年7月1日至7月31日，佇全國有1500間社區的藥師藥局，設立廢棄藥物檢收箱，民眾會當將茨內收集的廢棄藥物帶去附近的藥局，tan3入去箱子內‧
欲查詢恁兜附近的藥局會使進入：http://www.5214.org.tw
[4].如果是藥水、糖漿類的藥物，會當先將藥水、糖漿佮沙子、咖啡粕等等攪做伙，才用袋子封起來，才帶去附近的藥局，tan3入去箱子內‧
[5].空藥盒子亦是空藥罐子就依照環保體系回收方式去回收就會用哩‧
咱茨內有什麼算是應該愛檢收的廢棄藥物？
[1].急性病的藥品，無論是毋是已經過期，已經超過半年無食囉！
[2].無食完的慢性病的藥品，無論是毋是已經過期，嘛無確定是毋是會繼續食，已經超過半年無食‧
[3].無食完的指示藥、成藥[便藥仔]，已經超過半年無食‧
[4].電台、夜市仔亦是親朋好友紹介的藥仔，無確定是毋是合法的藥品，嘛確定是毋是需食‧
咱大家來保護環境，維護你我的健康，與台灣保留著清氣的寶島‧
全站熱搜
留言列表
