jimmycmlin的部落格

台語文~~~~~提早放人出獄甘對~~~~~遊子
阿扁總統佇上尾年的任期辦理特赦，復無幾工就有5~6千人會使提早放出獄，歡喜返茨和
親人做伙啦！對犯罪的人和伊的親人來講當然是好代誌，抑是由被害人佮伊的親人來講，
心內感受完全無共款，對所有的社會居民又有什麼影響？
最近佇頂禮拜(7/4~7/5)連續2工，佇阮茨附近就發生3件搶劫案件，毋管日時、欲暗仔
亦是暗時，有1個人騎1台機車的少年仔，嘛有2個人騎1台機車的少年仔，跤手真雄，搶
到皮包仔就雄狂騎真緊來走，歸禮拜囉！猶未有破案的消息，予逐人生活佇驚惶不安中，
尤其日頭落山後，復較毋敢出門‧社會治安實在有夠bai啦！
即陣是學生囡仔拄仔開始歇熱，食毒的、愛拍電動的、愛耍的、欲食毋做的少年仔，想講
用搶劫的較緊，又免本錢，警察無一定掠會到，雖然，暗路行久嘛有可能拄到鬼，準做歹
運去予警察掠到，入去監獄看守所，好運親像拄到政府辦理特赦，亦是踮籠仔內較乖，表
現較好，佇刑期過半就會使提早放出獄，無要緊啦！
不過，佇被害人佮伊的親人來講，心內的受傷佮驚惶不安有可能是綴著歸世人，上無嘛需
要經過真長的日子才有法度放袂記著‧即馬，動袂著就講什麼人權？結果攏是保護到加害
人、犯罪者的人權爾爾，對被害人佮伊的親人、所有的社會居民等等，實在完全無什麼人
權啦！咱來看嫌疑犯蓋頭布來遮面開始，到現行犯，判刑確定，入監獄看守所執行，一
直到尾仔提早放出獄等等，攏是保護到加害人、犯罪者的人權爾爾！
講來實在是悲哀啦！所以，提早放人出獄的政策到底甘對？