台語文~~想到50外年前的五日節－jimmycmlin的部落格

(古早牛車)
台語文~~~~~想到50外年前的五日節~~~~~遊子
今仔日是夏節(亦叫夏至)，是日時日頭上長的1工，俗語講：未食五日節粽破裘仔毋通放‧
有影耶！拜二的五日節拄仔過煞，暝日無開冷氣才袂用哩！講到五日節就想到50外年前過
五日節的情形，1幕1幕出在眼前‧
50外年前的台灣，逐家生活猶無快活，平均所得猶綴袂到菲律賓，彼時陣，社會上的一般
人攏嘛無什麼電器品，什麼電冰箱、冷氣機、電視機、洗衣機、電鍋、電烘箱等等；一般
茨內亦是有細台冰櫃就算好過日啦！毋管按怎，過節總是要予茨內大細歡歡喜喜才對啊！
即馬想起來，彼當時阿爸的頭殼真正巧，會記得五日節彼早起，阿爸就由菜市仔買寡平常
時較罕哩看到的物件返來，有豬頭、閹雞、鴨子、苦瓜、青菜、魚仔等，嘛一定有1粒大
西瓜；返到茨，大細漢攏歡喜來湊無閒：阿母先將豬頭、雞仔、鴨子洗清氣，續落1項1項
落大鼎sa予熟，阿爸講：雞仔、鴨子家己(台刂)趁腹內‧細漢的我聽無什麼意思，後來才
瞭解；阿爸講：牲禮家己sa趁油湯‧亦有：豬頭會使處理分出豬頭皮、喙管肉、豬舌佮豬
舌肉、頭殼髓、骨內肉、豬耳仔等等，1項物件會使變出幾仔項有用的料理‧雞仔嘛是共款
1隻雞出3項料理：白斬雞、竹筍香菇雞湯(寒天時改做麻油雞酒)、腹內牽太白粉炒做鹹酸
甜羹‧所以，阿爸講：只要2項材料就有法度做出7~8項料理啊！現此時佇逐所在所看到的
1雞3食法，1魚濟種食法等，可能就是按呢演變過來的喔！

(無塑膠箱時酒矸用綁的)
阮阿兄(人因)就拍倒大浴桶，先匟大塊冰角、大西瓜、汽水、麥仔酒，續落來才慢慢仔灌
水予滿，就按呢，冰到食中晝時，汽水、麥仔酒攏已經冰甲冷吱吱囉！大喙(口林)著心涼
脾肚開‧食飽後換來享受冰甲透心涼的大西瓜，即時陣嘛是阮上樂疼毋知熱的時‧
雖然無電冰箱、冷氣機、電視機，阮歸家伙仔食飯吹電風，(口林)著心涼脾肚開的汽水、
麥仔酒佮冰涼的大西瓜，大人開講，囡仔講笑，歸個趣味的氣氛絕對無輸即陣的過節啦！
經濟發展，時代變遷，科技的新產品一直出現，人佮人關係的改變，所有合做伙的結果到
底是算好抑是無好？有時陣實在講袂出啊！