台語文~~~~~人抑是老~~~~~遊子
昨昏下晝,返去茨陪阿母開講,過了正點鐘,想欲離開時,阿母問講:阿~~你叫做什麼名?
突然間我的心扭一下,感覺真驚惶,嘛感覺真心疼,阿母又閣退化一大步囉!
阿母將近欲90歲,少年綴阿爸為這個家庭拍拼,茨內外的工課做袂煞,養飼阮9個兄弟姊妹,
予阮隨人會曉pe,無走差去做歹囝,阿爸做生理,定定佇外頭走tsong,茨內外的大大細細
就靠阿母啦!少年時的阿爸佮阿母攏真勇健,閣較粗重,閣較艱苦的工課攏嘛無問題‧
阿爸佮阿母是生活佇物質欠缺的時代環境,兩人共心拍拼,綴著戰後台灣經濟的漸漸起飛,
予阮這個家庭嘛漸漸富裕起來,佇he的日本統治時代,因為種種環境的關係,阿爸佮阿母雖
然無法度讀真濟冊,不過,阿爸佮阿母攏是真正有智慧、有遠見,親像經營之神王永慶先生,
對事誌的計劃攏看真遠,做事真積極,凡事以正面思考去考慮,凡事斟酌頂真,為人處事肚量
真闊,阿爸佮阿母兩人毋哪會當同齊食苦,後來的後半世人,猶原會使共享富貴,翁仔某恩愛
,有頭有尾,所有的答答滴滴,攏是阮遮個序細的好模樣,是阮一定要學的茅割‧
自1991年阿爸先離開上天做神,阿母就變成真寂寞,身體嘛漸漸開始退化,予阮遮個序細毋
知應該要按怎才對?佇阿母心情上(黑禾)的時陣,我嘛放棄移民資格通過的機會,阿爸先離
開,阿母真寂寞的時陣,我實在無法度做我移民去國外,希望有較濟時間來陪伴阿母‧
人總是會老,阿母的囝孫佮蝨母仔一大陣,每年阿母的生日,亦是全家族大團圓的一日,由
起頭3桌到即陣全部參加要6桌啦!4代同堂,鬧熱滾滾,這個場面嘛是阿爸佮阿母上歡喜的
時陣‧
平常時囝孫佮蝨母仔輪流撥工返去陪阿母開講,拄仔開始是叫袂出蝨母仔的名,後來孫子的
名嘛叫袂出,遮是會當理解,閣續落來,過了一段時間,查某囝佮新婦的名嘛叫袂出,遮就
有較退化嚴重囉!無想到即馬,連親生後生的名嘛叫袂出,真正感覺驚惶,嘛感覺真心疼!
甘有影阿母又閣退化一大步囉?
醫藥科技雖然進步真緊,不過,對阿茲海默症(老年失智症)猶原無什麼特效藥,阮做序細的
只有把握時間好好仔陪伴阿母才是啊!
全站熱搜
留言列表