jimmycmlin的部落格

台語文~~~~~希望開墾出台語文版面~~~~~遊子
主編大人：平安！
貴報一直是正港台灣人心聲會使無煩無惱發表的所在，雖然，有時陣會當看到淡薄仔台語文
的文稿發表，不過，猶是親像鳳毛麟角，真正稀罕啦！其實台語並毋是干哪話語爾爾，台語
佮華語、日語、客語、粵語等等，亦有百外年前的朝鮮語、越南語等等，攏嘛是漢字系統之
一，只是佇台灣因為經過日本統治50年，閣經過中國國民黨的專制獨裁統治38年，予台語文
無法度光明正大上檯面，這是台語文上烏暗的時代‧
台語文佮即陣所有世界上所看到的英文、日文、西班牙文、法文、華文、韓文、拉丁文、俄
文、泰文等等，攏是完全共款，會使用佇日常生活中，包括：學校的教育中、報紙的報導中
、文學藝術中等等，攏嘛完全困難，只是無所在通表現爾爾‧拜網路科技的發達，即馬佇網
路頂，抑準拍出找揣臺語文的部落格，會使走出一大掛喔！用心為台語文寫作的人真正濟，
其實是超過咱一般人所想的‧
全世界講台語(閩南語)的人有六千萬外人，佇全世界猶排名佇前20名啊！比起漸漸消失的少
數族群的語言，講台語的人算猶真濟，會曉講台語自然會曉看捌台語文，除非無機會通看到
台語文的文章‧到即陣，講台語的人以蹛佇台灣這所在上集中，毋過，非常無採閣遺憾，佇
台灣銷路上大的報紙，就是貴報，猶無專門登出台語文文稿的版面！所以，誠心建議貴報，
會使考慮開墾出專門登出台語文的版面，毋管是：台語散文、七字仔詩、囡仔詩、現代詩、
長短小說、新聞辭典、臆謎猜、鬥喙鼓、俗語、俗諺等等的作品，一定會親像水泉歕袂停，
嘛保證愈來愈鬧熱，愈來愈精彩喔！
俗語講：怨無，無怨少‧原則上以橫的方式較好，因為除了漢字，有時會參有羅馬字母；半
版抑是半版的一半，閣減一半嘛無要緊，只希望先開墾出一個台語文版面園區，才寬寬仔來
增加擴大‧相信這嘛是真濟咱台灣人的心聲佮期待‧