close
新聞辭典~~~~~溫室效應~~~~~遊子
咱定定看到媒體報導：全世界天氣失常，普遍溫度提懸，有的所在做大水，有的所在是
洘旱，有的所在熱天落冰角，有的所在佇寒天提早開花等等現象，講攏是溫室效應的結
果啦！按呢，什麼是溫室效應啊？
日頭光的短波輻射入來到地球的頂面大氣層，是提供予地球表面逐種活動的主要能量；
這個能量經過土壤、生物等等個體吸收後，以長波輻射的方式倒彈反對射返去地球外‧
佇地球的頂面大氣層會當半路吸收部份的長波輻射，來確保地球的溫暖，賰的長波輻射
攏走倒返去外太空中‧
綴著工業進步發展，全世界人口一直增加，人類大量使用石油化學燃料，造成二氧化碳
(CO2)、甲烷(CH4)、氧化亞氮(N2O)、氫氟碳化物(HFCs)、全氟碳化物(PFCs)佮6氟
化硫(SF6)等等的氣體含量增加，遮個氣體較會吸收長波輻射，所以，造成傷濟的熱能
留佇地球的大氣層內，予地球表面的溫度一直竄懸起來，這種現象就叫做溫室效應‧遮
的變燒的空氣予地球溫度提懸，叫做溫室氣體‧
連續幾年來，溫室效應已經造成全世界無正常的天氣，俗語講：人無照天理，天無照甲
子‧因為地球溫度提懸，所有生活物的活動受到真正大的影響，親像：南北極的永久冰
原，開始漸漸佇融啦！予地球的海面升懸，真濟細粒島嶼才沉入去海底，變無、消失去
啦！大片陸地較低的所在，嘛予海水淹過，變成內海亦是湖塘啦！有的所在植物無
法度活落去，規片漸漸變成沙漠等等‧對全世界所有活動的影響實在有夠大復闊啊！
地球干哪1粒爾爾，咱全地球的人類實在要好好愛惜才是，天飼人才會久長，毋通定定
想講人欲勝天，抑無，到尾仔一定是人類家己做家己受啦！時到才知艱苦就傷慢囉！
全站熱搜
留言列表
