台語文演講稿~~~~~生活的苦楚佮趣味~~~~~遊子
各位評審先生佮在在場的朋友，逐家平安！逐個好！我是第X號，今仔日我欲講的題目是：
生活的苦楚佮趣味，生活的苦楚佮趣味！
俗語講：咱人有1好，就無2好‧什麼事誌攏共款，總是有好的1面，嘛會拄到
(黑禾) 的1面，佇咱的人生過程亦是每工的生活中，嘛一定親像甘蔗無双頭甜，一定會拄
到真濟煩惱亦是艱苦的大細項事誌，毋過，嘛一定會享受到袂少甘甜閣趣味的事項，予咱
永遠無法度放袂記得‧
會記得細漢時，一定是初一、十五才有三層肉通食，拄到年節仔才會當享受到大魚大肉，
茨內嘛無什麼開錢買的囡仔物，欲耍什麼攏嘛隨人家己去揣材料家己動手做，親像：炮仔
管、紙飛行機、稻草刀、林投葉做的動物、ta-pi-a、細粒沙仔包、辦公伙仔的物件嘛是
由生活中來取材料，親像：龍眼核、柚子皮、(木羨)仔子、芎蕉皮、芎蕉蒂等等，逐項攏
嘛隨人揣、同齊做，續尾仔才規陣做伙耍，佇彼時陣就已經時行即馬所講的DIY囉！由動
手做的過程，享受到真濟趣味，這亦是用錢買袂到的寶貴經驗啊！所以，大漢了後，養成
所有大大細細的事誌攏家自動手的好習慣，毋哪事事免要靠師父，又閣通省錢‧
進入社會揣頭路討食，定定是透早出門，暗暗才入門，頭家交待的事誌攏嘛無第2句話，
認真拍拼去做就是啦！功夫嘛是按呢漸漸仔積起來‧阿爸有交待：食頭路是欲學功夫，無
人食一世人的啦！毋過，做事業要攢本錢，阿爸閣講：儉錢無轍步，趁1箍儉5角，日久月
長就攢有本錢啦！抑是，趁1箍欲開2箍，永遠是褲袋仔袋磅子！要知影人2跤錢4跤，抑準
袂曉儉錢，永遠嘛要追錢‧所以，生活中一直保持著犧牲享受，過著簡單的日子‧過一段
崁站了後，斡頭返去看，才感受到起時的犧牲享受，才有後來的順序好過日‧
看到現此時的少年人，揣頭路討食的條件，要求：錢濟、事少、離茨近‧即種精神佮傳統
台灣人做穡的精神態度完全走款去啦！咱應該要知影甘蔗無双頭甜的道理，閣較要有倒頭
食甘蔗的做穡精神才對！抑無，就是造成真濟社會問題的卡奴事件‧俗語嘛有講：無求好
生，上無嘛求好死‧雖然，生活有真濟的苦楚，嘛有真濟的趣味，咱甘願是來艱苦頭，才
會當有快活尾‧真正享受到生活的苦楚佮趣味！
留言列表
