jimmycmlin的部落格

用藥保健~~~~~電腦視力綜合症(CVS)~~~~~遊子 2009.12.05.
現此時是使用電腦網路資訊上普遍的時代，真濟人無分歲數、職業、階級、查埔、查某、日時、暗時、做穡時、歇睏時等等，規日坐佇桌子前，目睭金金相電腦來做穡看資料耍電動，長時間的使用電腦網路資訊產品，日久月長，會漸漸造成新的時代病症：電腦視力綜合症(Computer Vision Syndrom;CVS)‧
佇臨床上電腦視力綜合症表現出來的症頭有：目睭紅赤、目睭乾閣酸澀、畏光、覺會悿，較嚴重時亦併出現頭疼、肩胛酸疼、尻脊phiann酸疼等等；亦有少數的人視力度數增加，無論近視、老花仔目攏會加深度數，因為目睭仁的聚焦無正常啦！
依據統計，抑是每工連續使用電腦網路資訊產品，達到6點鐘以上時，有75%的人會產生電腦視力綜合症現象‧長期坐佇電腦前，尤其佇室內無通風的空調內，亦欠運動，結果工作效率降低，嘛賠上家己的健康，所以，隨時攏需要較頂真細膩注意才是‧
平常時會使注意下仔幾點：
(1).不時愛補充體內水份，佇冷氣房時室內壁角匟1桶清水，予空氣未傷乾燥‧
(2).室內光線愛充足，螢幕亮度對比調予適當‧
(3).因為專心盯螢幕，目睭較無[目聶]，會較乾澀，所以，愛會記得[目聶]目，保持目睭內有目油通濕潤‧
(4).建議每半點鐘來歇睏5分鐘，上無1點鐘來歇睏5分鐘，予點鐘來目睭較未悿‧
(5).平時亦愛注意營養，飲食毋通撿食，卵白質、葉黃素等對目睭真有幫助，防止目睭老化退化‧
(6).定期去眼科醫生做檢查‧
總是預防較贏治療，佇工作外猶原會當維護目睭的健康，是上好的啦！