jimmycmlin的部落格

用藥保健~~~~~轉化症~~~~~遊子 2009.09.01.
媒體報導：有參加88水災的志工，去災區幫忙救災搬徙屍塊，倒轉茨以後，
惡夢連連，毋哪睏袂去亦無法度行路，予人送去病院，醫生講這是得到轉化
症啦！
什麼叫做轉化症？
轉化症的臨床表現一般是：患者將心內受到的衝擊，用身體外表的症頭來表
現出來‧特別親像跤手麻痺、目睭看物件矇霧等的神經無正常較濟‧主要病
源是因為患者佇短時間內受到真大的壓力時，心理上的接受整合能力無法度
擔落來，後來出現身心解離無法度配合的情況，續落來出現身體外表的症頭
來，這毋是患者刁工去假的喔！
身心專科醫生講：源本有憂鬱症、較會煩惱的人，比較較會引起轉化症的發
生‧所以講：無論是受難者、家屬亦是參與救難人員等等，面對重大的災難
衝擊時，絕對毋通強忍悲傷哀慟，目屎吞腹內，家己一人去承擔，應該愛透
過親朋好友來幫忙放疏心內的壓力，萬一猶無法度改善，繼續出現睏袂去亦
是無法度行路的情形，愛隨緊去病院，予身心專科醫生診斷幫贊你，提供正
確的用藥佮減輕壓力的方法。