jimmycmlin的部落格

新聞辭典~~~~~阿公阿媽節~~~~~遊子 2010.08.20.
媒體報導：因為超過6成的孫子輩毋知家己阿公阿媽的名，教育部提議自今年開始，每年的8月份第4個禮拜日設定為咱台灣的阿公阿媽節！所以，今年是8月29日，明年是8月28日‧
俗語講：一代親，二代表，三代無了了‧有影喔！原本的意思是指第三代的親族互相較少交陪，漸漸無來無去，準做佇路相拄亦無熟似、無相捌‧現此時閣較嚴重耶！依據中正大學成人佮繼續教育系研究團隊發表”跨世代互動關係調查”的報告：針對1167位阿公阿媽輩、705位阿爸阿母輩佮1995位孫子女輩進行調查，結果發現到，8成的阿公阿媽會當順序叫出家己孫子女輩的名，嘛記著真正清楚；顛倒是孫子女輩只有3成7有法度叫出家己阿公阿媽的名爾爾‧
另外，有近4成的阿公阿媽會當記得孫子女輩的生日，閣較予人意外的是只有5.8%的孫子女輩會記得阿公阿媽的生日，有近6成完全毋知影阿公阿媽的生日是什麼時陣？嘛有1成的阿公阿媽毋捌佮孫子女輩同齊出去遊覽、佚佗‧
現代的阿公阿媽上嚮望孫子女輩教[人因]的3項代誌是：學電腦、提供身體保健資訊佮使用手機仔‧換轉來講，孫子女輩上欲教阿公阿媽[人因]的3項代誌是：提供身體保健資訊，毋通胡亂買廣告藥仔佮什麼健康食品來食、學電腦、防制詐騙‧
現此時已經行入年歲愈來愈懸的時代，每1人做阿公阿媽的時間平均大約有25年，政府機關會使舉辦較濟阿公阿媽佮孫子女輩同齊共學的活動‧所以，佇兒童節、母親節、88節以外，又閣增加阿公阿媽節，亦是非常需要佮有意義啦！來台灣留學的俄羅斯學生嘛講：俄羅斯的阿公阿媽節是每年的10月份上尾仔的禮拜日，每年攏有辦溫馨的活動喔！