jimmycmlin的部落格

新聞辭典~~~漸凍人症(ALS)佮冰桶數學~~~遊子  2014.08.20.

媒體報導：最近全世界當時行淋規桶冰水後，寄付善款來幫助漸凍人症患者的活動，這陣風亦吹到咱臺灣囉！什麼是漸凍人症？

漸凍人症佇醫學臨床上叫做：筋肉萎縮性脊髓側索硬化症，英文是Amyotrophic lateral sclerosis,ALS‧到目前為止是全世界5大絕症之一，致病的原因病母猶原無清楚，亦無法度完全治療好；上會發生佇人生中年的階段，尤其查埔較濟過查某，咱全臺灣差不多有800~1200位病友。

漸凍人症這是因為體內運動神經元的功能受傷損害，造成漸漸進行的神經筋肉退化，病友會漸漸面對著四肢無力、吞物件愈來愈艱苦佮有口難言的困境，佇臨床統計來看平均3~5年會呼吸衰竭，就親像去予冰角凍著，所以，俗稱漸凍症,ALS；雖然肢體無法度照心意自由轉動，毋過，(人因)的心智攏完全正常、意識攏真正清楚，對外界代誌感覺的敏感度佮一般人完全共款。

淋規桶冰水後，寄付善款來幫助漸凍人症患者的活動，是任何一個人佇淋規桶冰水後，會當指定其他3個人來繼續接受這個動作，來親身體驗著漸凍人症的病痛感覺，又閣捐款做善事；由上起頭1個人指定3個人，3個人指定9個人- - - - ，佇數學上就是以3的3次方來繼續推展，照按呢算落去，第16工就會當累積達到2千1百外萬人喔！亦是講只要2禮拜外，咱全臺灣人就會輪透囉！全世界70億人口嘛佇第22工就會輪透囉！實在真驚人啊！