jimmycmlin的部落格

新聞辭典~~~~~金銀紙~~~~~遊子 2010.08.24.
每擺年節仔時、寺廟鬧熱時、七月普渡時亦是茨內拜拜好歹事時，咱的風俗攏會燒金銀紙，風俗是社區住民約定成俗，嘛會隨著時代的變遷，生活環境的變化，會當來調整，親像現此時大家注重環保，盡量減少空氣污染，所以，寺廟新起環保金爐，信眾拜拜時燒金銀紙是愈來愈少，亦有什麼環保金銀紙上市，毋過，佇大樓社區是完全禁止燒金銀紙，毋管是傳統的金銀紙、新式的環保金銀紙，攏袂用哩燒啦！
大家綴著燒金銀紙，甘知影金銀紙有什麼無共種類佮意思？咱台灣竹南中港地區是製造出產金銀紙上集中的所在，依據製造者的解說：一般所用的金銀紙實在分做3類，金紙、銀紙佮紙錢‧
金紙類是用錫箔漆金藥，正面亦是邊仔面印有紅色印，使用的對象是天地神明、佛、菩薩、祖先[靈]等等，是用佇祭拜、祭祀、奉獻、祈福、求平安時陣，較倢用到的是土地公金[亦叫做福金]、割金、四方金、壽金、大百壽金、天公金等等‧
銀紙類是無漆金藥，保留著錫箔原本銀色的外觀，使用的對象是祖先[靈] 、陰界佮陰靈為主，用途佮金紙類真親像，佇祭拜、祭祀、奉獻、求平安時陣，正面無印紅色印，較倢用到的是銀紙、大銀、小銀、四方銀、蓮花銀等等‧
紙錢類無一定有用錫箔，一般是以圖樣亦是印文來表示用途，使用的對象是天、地、人間的眾神靈，主要是由法師來指派使用，用佇祭改儀式佮趨吉避凶，一般人絕對毋通隨便使用‧紙錢的種類佮變化嘛真正濟，親像：往生錢、甲馬、更衣、金庫錢、私庫錢等等，有的紙錢閣跳脫傳統四正的外形‧
最近20年來，因為成本關係，大部份製造出產金銀紙業者遷徙至東南亞國家，後來換去中國，由上旺時的6~7百間業者，到尾仔賰10外間爾爾，毋過，留落來的業者，維持上好的品質，又將藝術佮金銀紙結合，創造出新產品，嘛非常受到消費者的接受佮歡迎喔！