台語文~~~~~韓國旅遊[4]~~~~~遊子 2010/8/28.08.28.
欣賞夜景佮透早看日頭出來，佇台灣嘛是機會難得；親像去草山竹子湖、白雲山莊，中部橫貫公路的大禹嶺、慈恩、天祥，高雄旗後海岸邊，桃園虎頭山頂、竹圍仔海邊—等等，攏是欣賞滿天星光的好所在；亦欲看日頭出來，阿里山、太平山、台東花蓮的海岸等等，攏是真讚！透早天未光就要起床，嘛要看運氣好[禾黑]，並毋是每次攏看會到‧
這次來到韓國上北爿的雪嶽山國家公園，位佇東海邊，韓國所講的東海就是世界地圖的日本海，旅館就佇海邊的山崘仔，暗時10點外，企佇懸懸的涼亭仔，四界暗濛濛，是欣賞月娘佮滿天星光的好所在，聽著海湧輕輕仔拍岩壁的聲，吹著微微仔涼風，實在嘛算1種享受‧
山腳有1個小漁港，港口邊有七彩的燈火，是飲麥子酒、食海鮮，做暗光鳥鬧熱的所在；閣較遠的沙灘海岸，規排燈火光耀耀非常刺目，hia是另外1蔟趣味夜生活的所在‧予遊客佇暗時猶原免驚無位通去消遣‧遠遠的天頂，不時嘛有看到人放煙火，1陣1陣真正嫷，只是一目[目聶]就無去啦！
隔工透早4點半鬧鐘仔就叫囉！看出窗子外天色猶暗，只有路燈的光，欲看日頭出來當然要比日頭較早起床才會用哩！熱天時的透早亦感受到稍可仔涼意，寬寬仔行到觀賞點，嘛已經未少遊客早就踮hia等啦！聽[人因]講話，差不多攏是韓國人較濟， 無落雨，想講可能有機會看到；東海海面，天連海，海連天，遠遠遠的火光，1點1點，應該是行佇東海的船隻‧山腳漁港的小燈塔，嘛閃爍著燈塔火，為出入漁港的漁船來指路‧
天頂的雲漸漸轉白，天色亦漸漸光，毋過，遠遠的天際線一直無看到火球跳出海面，可能是雲傷厚，遮著金黃色卵仁跳上海面的畫面，大家等待到5點半，毋死心亦無法度啦！只好四四散散來離開‧
不偌遠的海面，有細隻竹排仔漁船出來掠魚，漁民拋出魚網仔，予平靜的海面，引起1波1波的水波，予邊仔遊客欣賞到在地人生活做穡的情況‧雖然，無看到日頭出來，會當欣賞到無共的景緻，亦是真好啦！
留言列表
