台語文~~~~~韓國旅遊[3]~~~~~遊子 2010.08.16.
自囝仔大漢以後就真久無去遊樂園囉！抑無，自台北圓山動物園佮相隔壁的兒童樂園、板橋的大同水上樂園、關西的六福村野生動物園、龍潭的小人國、石門水庫的亞洲樂園等等，攏嘛是陪阿爸阿母佮囝仔上倢佇歇睏日做伙去的所在，三代做伙歡喜甲有賰‧後來出國，狄斯奈樂園[Disney Land]位佇洛杉磯、東京、香港等亦攏耍過，這擺來到韓國的愛寶樂園[Ever Land]，號稱是目前全世界排名第7大的遊樂園‧
韓國是支持大財團發展為世界性的大企業，親像：現代[Hyantai]、三星[Samsung]、LG、起亞[Kia]---等等，愛寶樂園就是由現代集團所經營，起頭10年攏無趁錢，後來遊客愈來愈濟才開始有趁錢，毋過，設備的擴建佮安全檢查一直做著真郝‧遊覽車來到外圍的停車場，哇~!滿滿是的大型遊覽車，另外一爿是小型車的停車場，遊客規定踮遮換坐樂園提供免費的轉運車，3分鐘1班車，遊客濟時1台接1台，隨時開車真方便；隨著轉運車徙來徙去，哇~!愈倚內面又有幾仔個小型車的大停車場，早就停甲滿滿滿啦！所以，轉運車有閣設2位車排予人起落車，看來免費的轉運車嘛毋哪1條路線爾爾，又閣稍可仔[足百]崎才到愛寶樂園門口的大廣場‧干哪看到停車場的規模佮滿滿滿的情況，就感覺依現此時咱台灣任何遊樂園的規模就已經綴未到啦！
領隊講：予大家6點鐘的時間留佇內底耍，暗頓隨人家己負責解決，因為所在有夠闊，遊客有夠濟，有的所在可能愛排隊等候規點鐘，伊交待大家時間愛掠予好，一定愛準時返來集合點，做伙坐車返去旅館，抑無，可能愛到半暝才通歇睏喔！
樂園內的茨啦！樹仔啦！服務人員啦！賣店啦！攏妝扮甲五形七彩，予人感覺真趣味‧先去排隊坐流竉，有嬰仔車的家族，服務人員會為你將嬰仔車掛佇流竉的後壁，同齊落到對岸，實在方便佮搭心‧坐流竉時，下面鋪設安全網子，予人較安心，由懸的所在漸漸降低，會當欣賞著全樂園內的景緻，看到遠遠非常懸大的雲霄飛車，由上懸衝落來，清楚聽到大家驚甲吱吱叫！20年前我嘛敢坐，年歲增加以後，健康保重較要緊，較斬節著，欣賞別人吱吱叫就好啦！親像海盜船、360度翻滾船、直直落落的重立加速----等等，攏嘛佮我無緣‧
3D立體電影館，排25分鐘，欣賞5分鐘，自阿凡達[Avanda]以後，3D立體電影真時行，其實30外年前佇洛杉磯的狄斯奈樂園就已經欣賞過；野生動物園排50分鐘，坐遊園車欣賞7分鐘，動物無濟，較輸咱早期的六福村野生動物園，只是看到10隻基因突變的白虎佮1隻獅虎配的後代[英文是Liger.華語叫彪]，算是較特別；坐漂流排20分鐘，徙1輪轉4分鐘，是趣味趣味，原本用英語拜託共氣艇的人替阮翕相，說謝才聽到[人因]嘛講台語，緊閣用台語佮[人因]講幾句仔，可見台灣人來的亦袂少；其他亦有欣賞動物表演，嘛是排20分鐘，欣賞15分鐘，用貓來表演的較少，跳箍仔、跳舞、躦懸躦低，嘛是趣味；天色暗落來，規園變成午彩的燈火，摩天輪慢慢仔轉，風車因為無風企直直，四季花園是仿歐洲式的設計，是袂[禾黑]，毋過，去過巴黎的凡爾賽宮、維也納的熊本宮的人，就無感覺什麼特別囉！每間餐飲店攏是人kheh人，阮就踮花園內坐塗腳食水蜜桃做暗頓，3粒1萬韓國錢，算來1粒新台幣100箍，甜芳佮有水份，嘛是無貴啦！又閣是特別的1頓；暗時8點半有樂園內的妝扮徙街遊行表演，因為排隊坐流竉的人排真長，為著欲準時返去集合，只好放棄等看遊行表演的鬧熱，團體行動準時較要緊‧
留言列表
