jimmycmlin的部落格

台語文~~~~~種電較贏種田~~~~~遊子 2010.08 08.
媒體報導：舊年88莫拉克風颱水災滿1週年啦！欲找揣台灣新的生命力，種電較贏種田，種電比種蓮霧趁較濟‧什麼是種電？欲按怎種呢？
舊年88水災予屏東縣的水產養殖區佮種蓮霧的所在變成受害非長嚴重的災區，這幾年來又拄到全世界暖化的問題，所以，由屏東縣政府提出發展太陽能發電計畫，經由經建會同意，是咱台灣國內第1個災區種電重建計畫開始囉！以水產養殖區的魚塭仔佮蓮霧園為優先對象‧
由屏東縣政府佇今年年底以前來協助投資廠商佮台電公司完成簽約作業，每度電的售價是12.9772箍，抑是順序進展，預定上緊明年就會當發電‧進前屏東縣政府先佇林仔邊、佳冬、枋寮等所在推動試驗計畫，佇阿波羅新能源集團所屬的淳宇科技公司協助下，成果予屏東縣政府真正滿意‧預定實施土地由40公頃擴大至1200公頃，到時是咱台灣國內尚大規模的太陽能光電區域‧
能源科技講求的是重環保、有效率、穩定性好，予政策的推行是一舉兩得，親像俗語所講：一兼二顧，摸蜆仔兼洗褲啦！亦有廠商建議：電力城與黑珍珠蓮霧園會使同齊並存‧黑珍珠蓮霧園照常種佇土地，園仔頂頭才架置太陽能板佮光電設備，互相袂去影響到‧廠商煩惱的是：會閣淹水喔？沿海鹽化的程度會嚴重袂？
對在地農民來講：做田1分地種蓮霧每年收入7~8萬箍，扣除開支所費本錢後，干哪趁3~4萬箍爾爾，依據種電計劃，1分地租金就有7萬外箍，猶友機會參入去做管理工作，每個月亦有成萬箍的收入，當然是算會合，大家嘛搶欲來參加改種電計劃‧
水產養殖業佮種蓮霧的風險大，種電計劃有穩定的收入，所以，這個災區種電重建計畫一定愛予成功，大家嘛相信一定會成功啦！