台語文~~~懷念阿爸~~~~遊子 2014.08.08.
又是1年1擺的88父親節，阿爸離開阮亦已經20外年囉！
毋過，阿爸的精神一直留佇阮的心內，亦一直落實在阮的日常生活中。
阿爸是外表真有形威，心內充滿著關懷的人，佇團體內拄到對眾人有幫贊的代
誌，一定是出錢出力出時間，一定是輸人毋輸陣啦！
買賣算分，相請無論，貨真價實，童叟無欺。這是阿爸做生理的原則，亦是阿爸出社會後一步一跤印，漸漸進入成功的步數，這亦符合現代的企業經營的精神。
現此時理財風氣真時行，理財專員滿滿是，講著喙角專專波，其實阿爸早就講：欲賰錢真簡單，人兩跤錢肆跤，趁1箍開5角，日長月久，自然會賰錢；抑是，趁1箍開2箍，無偌久永遠嘛愛走銀行3點半‧亦有講創業惟艱，守成不易‧看到真濟身邊的實例，頭腦好又拄到時機掌握對，趁到真濟家夥，可惜守袂牢(tiau5)，到尾仔家夥去了了，換勢猶閣愛走路！
講著財富，每人攏共款，平時只有靠勤、儉，尤其少年人，絕對毋通一起頭就想欲食好做輕可，抑無，食老才知苦；天公伯仔真公道，予每人一生中上少會拄到1擺大財運，無意中錢銀一直入庫，只是看你是毋是守會牢(tiau5)，抑無，就只是過路財神爾爾。
毋管按怎，無論讀冊、食頭路、做生理、開公司、做事業、援(huann7)家事------等等，總是愛自力更生，自立自強‧才會當自助天助，貴人相助‧
人生無論什麼階段攏一定愛有目標，亦無就親像柴板佇大海沐沐(bok8-bok8)-泅，想欲讀冊就愛認真讀，所讀的攏是家己的；無想欲讀冊時就去學師仔功，嘛是愛拍拼學，因為社會上360行，行行出狀元，只要拍拼認真學，3年4個月出師後，佇社會企起生活攏嘛無問題。
阿爸認為學校讀冊是增加知識，社會大學毋哪增加知識，亦增加智慧，人生是活到老學到老；這嘛是咱教育上所講的終身學習啊！
每逢過年過節時，攏會想到阿爸阿母過去所講的話，因為彼(he)亦是阿爸阿母留予阮序小上寶貴的物件啊！
留言列表
