jimmycmlin的部落格

咱的台灣~~~~~做16歲轉大人~~~~~遊子
今仔日立秋，續落是舊曆7月啦！7月初7是七娘媽生，家家戶戶要攢物件敬拜七娘媽，
拜完將紅絲線穿過有中空的銀角仔，掛佇茨內囡仔人的頷仔管，保庇茨內囡仔平安gau
大漢‧抑是已經16歲的囡仔人，就進行做16歲轉大人的禮‧
古早台灣講：1府2鹿3艋舺，1府就是古都台南啦！台南是嘛每年擴大舉辦做16歲轉大
人的儀式，爭取做為國家指定無形的文化財產‧
佇古都台南做16歲的習俗是起源佇五條港地區，家家戶戶茨內有囡仔已經16歲，就會佇
7月初7七娘媽生即工舉行轉大人的成年禮‧茨內是查埔囡仔就做紅龜，是查某囡仔就做
双連龜，拜完分送茨邊隔壁來分享；外媽要準備新衫、禮品來送予轉大人的孫仔‧對做
16歲轉大人的囡仔人來講，隔轉工開始，替人做穡時，毋是閣領半額的囡仔工，是領全
額的大人工囉！這個習俗漸漸傳到歸個台南地區，閣到台灣西部沿海地區，一直到台灣
頭台灣尾‧
傳統做16歲的禮式是要準備麻油雞酒、麵線、2支帶尾的甘蔗、四果、五牲、六色菜碗
、七碗甜竽仔、紅龜粿、金紙佮七娘媽亭等等的祭品，佇大門口祭拜主司看顧囡仔的神
明七娘媽，祭拜時叫茨內的囡仔輪流躦過神桌跤，踅七娘媽亭，男倒女正踅3箍，上續
尾將七娘媽亭燒掉奉獻，歸個儀式完成，嘛表示已經轉大人啦！