jimmycmlin的部落格

台語文~~~~~仙拼仙~~~~~遊子 2010.0724.
無意中看到某1個人氣真旺的電視節目，邀請4位南部地方電台的主持人為來賓，因為這4位查某的主持人喙水真正好，講話順溜，喙舌未拍結，雖然，4位主持人隨人有特色，毋過，攏予人聽著真趣味，保證大家聽甲喙仔裂撕腮腮，真想欲聽後1句是按怎？
4位查某的主持人自頭到尾仔，攏是用正港的台灣話開講，分享[人因]的主持心得佮過程中一寡仔趣味的代誌，雖然，[人因]的聽眾無分歲頭，亦查埔查某攏有，尤其中年的佮老大人較濟；雖然，[人因]的目的是欲賣藥仔佮健康食品，毋過，佇廣播過程中佮聽眾的對話、鬥喙古，並毋是干哪賣藥仔膨風爾爾，有時亦充滿著關心的口氣佮心意，予無助的聽眾、孤單寂寞的老大人得到心理上的安慰，所以，聽到尾仔總會甘願提錢出來買[人因]所宣傳、推荐的藥仔佮健康食品‧
最近衛生管理機關攏佇掠地方電台的賣藥仔節目，掠到違法的節目內容，確認違法的事實，就開單罰錢；雖然，衛生管理機關的出發點是對的，毋過，對著前仔的情況，是庄腳所在消費者需要的，電台的賣藥仔節目才有法度活落去，繼續生存落去，這個市場才有赫呢阿濟人來支持‧
佇[人因]佮聽眾對話中間，會當聽到學到真濟台灣俗語喔！親像：
未做衫先做領，未嫁尪先生囝；就是華語所講：先上車後補票‧
欠錢怨債主，不孝怨父母；就是未曉自我反省，只會曉怨別人‧
文不成僮生，武不成鐵兵；表是無1項會曉啦！
大姑大偌婆，小姑賽閻羅；表示嫁入門新婦心內的感覺‧
大暑無雨水，續落對天跪；表示大暑這工無落雨，續來會渴旱‧
佇[人因]佮聽眾對話中間，亦會當聽到寡笑詼，聽到自然笑出來‧親像：
1對翁仔某旅遊時，來到養豬場參觀，場長紹介講：場內優良品種的豬哥，上頭勇的1工做10擺，亞軍的亦有6擺-----‧
嫷某聽到對[人因]翁使目尾，意思是講：你看！豬哥1工會使做赫濟擺，你呢？
[人因]翁看到嘛瞭解[人因]嫷某的意思，頭仔犁犁，想無按怎應才好‧
過一下子，伊問場長講：場長！場長！你講上頭勇的豬哥1工做10擺，亞軍的亦有6擺-----‧甘是每擺攏共1隻豬母？
場長大聲應講：無囉！每擺攏嘛是無共隻啦！
即時換[人因]翁對[人因]某使目尾，意思是講：你看！豬哥1工會使做赫濟擺，每擺攏嘛是無共隻的啦！
換[人因]翁佇微微仔笑！
當然賣藥仔佮健康食品時胡亂[火贊]、亂膨風是毋對啦！親像：
食了啞口會講話，跛腳會當走相-jik，坐輪椅的會使起來行，臭頭爛耳會當變成白拋拋、幼綿綿，予查某人該凸的凸、該瘦的瘦，予查埔人擋久、猛閣勇，予得癌症的人免開刀，敗腎的免洗腰子--------等等，有影是毋通聽，抑無，絕對是開錢拍歹身體，延誤病情，害著家己佮拖累親人爾爾‧咱身體的健康需要咱家自顧，遵守著：有病看醫生，用藥問藥師‧才是正確的保健之道‧
原本電視節目非常搶市的2位主持人喙水是真正好，毋過，拄到這4位南部地方電台的主持人，才予[人因]2人佇節目中變成閒仙仙‧有影是隔行如隔山，術業有專攻，天外有天，人上有人，今仔日拄仔好欣賞到仙拼仙啦！