jimmycmlin的部落格

台語文~~~~~排隊~~~~~遊子 2010.03.30.
自細漢有記智開始，就知影真濟場合需要排隊，親像：欲上車[無論什麼車]、欲去便所、團體欲食飯、欲去看戲、看電影、看比賽、開車欲過橋、欲過收費站等等，毋過，佇記智中的印象，大部份的時陣，攏是相爭相搶的場面，門口總是擠規堆人，亂糟糟，亂哄哄，爭車道，像俗語所講：輸人毋輸陣，輸陣歹看面‧除了有老師、教官、警察的時陣，大家規矩才有較好淡薄仔‧
一直到入社會後有機會出國，才發現到佇進步的國家，平平是需要排隊的時陣，人就是人，車就是車，完全無相爭相搶的場面，先來慢到隨人照順序，予我心內真大的驚嘆！想著平平是人，怎樣會差赫尼阿濟？咱台灣人去到進步的國家，亦是綴人乖乖仔排隊啊！是人的本性無共？亦是國家教育的失敗？倫理道德標準無共？亦是政府無能？亦是有其他的原因？佇hit當時，我無法度想會曉，只想講：咱台灣人甘無法度排隊排甲親像進步的國家共款？心內真嚮望有1工一定會當進步到hit個崁站‧
自台北市捷運系統起行開始，佇捷運車站內總算看到大家照順序排隊，電車停好勢，嘛一定讓車內人客先落車，排隊的人才順序上車；後來通車的地區愈來愈闊，由台北市擴展到台北縣，無分都市亦是郊區、莊跤，只要佇任何捷運車站內，人客攏一定好好仔排隊；高鐵通車後，嘛是共款看到親像佇捷運車站內排隊的情形，猶有，佇欲過收費站時，亦是2車道減少為1車道時，大家駛車較會相讓，互相尊重，正爿過1台，換倒爿過1台，正爿倒爿輪流過，大家駛車省時間又較未起火氣，予在場的人攏感覺真爽快‧
毋過，佇台鐵月台、市內巴士、客運公車等等，相爭相搶的場面猶原無改善，予人感覺真奇怪？有人坐火車來台北市，轉搭捷運又閣坐市內巴士，有時陣會排隊，有時陣綴著眾人搶欲上車，到底問題出佇叨位？
原來逐種規定欲予眾人接受佮遵守，是需要有關設計來配合啦！以佇捷運車站內會使看到大家照順序排隊來講，主要因素有：
[1].事前的宣導予眾人知影規則是按怎‧這是規則的透明公開‧
[2].月台現場有清楚畫巡，知影照順序排隊的所在‧
[3].月台現場有警衛人員維持大家守規矩，抑無會受罰‧這是法律的徹底執行‧
[4].電車進站停妥當時，一定是車門對準月台現場上車畫巡的所在‧這是工程設計非常精準佮駛車控制功夫的茅割‧
[5].萬一有人無照順序排隊上車，已經佇排隊的人會喝聲來勸阻，這亦是社會公德心的表現‧

由以上5點湊起來，欠1項嘛袂用哩！咱對照台鐵月台、市內巴士、客運公車等等來比較，台鐵月台、市內巴士、客運公車等就是欠缺前仔的1~5點，準做原本大家乖乖仔排隊，車來囉！結果車門無對準月台現場上車畫巡的所在，亦是無對準大家乖乖仔排隊的所在，莫怪大家相爭相搶欲上車‧這當時的現場袂亂糟糟、亂哄哄才是怪事！這亦是這幾10年來完全無進步上大的原因啦！
其他需要排隊的情形，只要有前仔的5點，一定做著公平，予大家無話講，嘛袂像前幾工發生佇蘭嶼欲等飛機時，因為有人插隊排隊無公平，引起予外國人無歡喜的意外事件。咱台灣需要進步改善，由佇捷運車站內佮坐高鐵來看，咱台灣人共款會當照順序來排隊，所以，欲全面達到大家攏會當照順序排隊的地步，需要政府好好仔來tshua7-頭，規劃好前仔講的5點，確實來執行做到，相信咱全體台灣人攏絕對做會到啦！