台語散文：踏入第三個10年囉~遊子 2011.02.28.原稿.2021.11.15.增補.
今仔日無意中揣到10年前的感想文。亦閣一擺有深深的感受，國家、社會、家庭、親友間人事的變化共款亦是非常大！當然亦有無變的所在！咱先來回顧10年前的原稿，有現況補充部分以【 】來寫出。
俗語講：時間像水流，一去無回頭‧亦講：光陰像箭，一目[目聶]就一世人‧10年的時間，講長無偌長，講短亦無短，會使予1欉小樹變成大欉樹，予細漢嬰仔變成囡仔臋[音tun5]，所以，俗語講：十年樹木，百年樹人‧”228”這工是台灣的”受難日”，後來佇10外年前改為”和平紀念日”， 這工亦是我個人佇人生的馬拉松換跑道的日子，到今亦拄仔好10年囉！孔子公毋敢接隔暝帖，所以，此後10年會按怎？我毋敢講，不過，斡頭看過去的10年，無論國事、家事、公事、個人事，攏有非常大的變化，心內感受非常深‧
這10年，咱台灣行過2次的政黨輪替，原本想講咱天頂的烏雲欲漸漸開散去！可惜台灣人實在傷憨直、傷單純，講好聽是善良有包容性，可能是400年來予外來族群統治慣勢啦！一直是予人軟塗深掘，予這塊土地一直無法度轉為正常的國家，戰後來台灣的統治者，包山包海包一切！雖然，有達成第一次的政黨輪替，毋過，輸的毋甘願，反共變聯共，食未著時伊就無管咱死活，加上台灣人予分化、好騙，所以，天頂烏雲重蓋轉去，造成第2次的政黨閣輪替，予咱台灣親像鐘錘，[扌亥]過來又閣[扌亥]過去，毋哪無法度變成正常的國家，顛倒強欲予人合落去囉！未來10年咱台灣會變成什款，完全愛靠台灣人的選擇啦！【咱佇日頭花運動後，少年人的覺醒，佇2016年閣政黨輪替過來，一直到2020年保護台灣到今！世界多變，2019年底起武漢肺炎Covid-19侵擾近2年啦！世界疫情有時好有時閣傳湠，咱國家全民一心防疫，佇全世界算是防疫排頭陣‧】
10年前，起頭先進入小學的志工隊，參加河洛語組的研習，後來拄仔好有機會參加教育部舉辦的”鄉土語言教育支援人員”認證考試，名稱[身長] [身長]長，其實就是”母語”啦！嘛好運順序通過，”母語”是阿母講的話，無論什麼族群、什麼人，出世後聽到的就是阿母講的話啊！佇河洛語組教學相長，由早期的”漢學仔先”來教，由十五音入門，以”彙音寶鑑”為參考冊，雖然，台語講半世人囉！猶毋知學台語有一套完整的教學步數，佮戰後一般的台灣人共款，只會曉講、會曉聽，毋知河洛語有字、有文章、有詩詞、有七字仔、有歌謠、有戲劇等等，毋知按怎欣賞家己的母語，未曉按怎來教序細，當然這是外來族群統治的結果‧即時，心內先驚惶，續落來是歡喜，總是佇後半世人會使參與搶救母語的活動‧
小學的母語教學佮鄉土語言活動，愈辦愈濟，嘛愈來愈趣味多元，參加的大人囡仔嘛愈來愈濟，講演比賽、朗讀比賽、歌謠比賽、講古比賽等等，亦有傳統生活的物件展示、年節風俗活動等等，只要校長有心配合推動，老師、學生囡仔、家長、志工隊等等，攏真熱心來參與，普遍來看，學生囡仔的聽佮講是進步真濟，大家嘛驚醒母語的重要佮捌著母語的嫷，母語的雜誌、文章亦漸漸出現，網路上的台語部落[英文講的Blog]亦愈來愈濟喔！非常可惜！佇2008年第2次的政黨輪替後，政府政策又閣斡頭踅倒轉去啦！這是予人真疼心的代誌啊！咱毋通失志，咱愛繼續來推展母語教育，毋管政府的政策，日常生活中無論何時何地，大聲講出咱的母語‧【鄉土語言教育有沓沓仔推展至幼兒園必修、國中高中內選修，總是有比無較好；教育部亦佇2011年編輯出台灣閩南語常用詞辭典，統一台語文寫作用字，是真正實用需要佮有幫贊。】
10年來因為閒的時間增加，才會當投入公會的活動，貢獻淡薄仔力量，參與用藥安全佮反毒品宣導，有機會進入社區大學講課，看到7~80歲的阿公阿媽認真來聽課，予人足感動！進入查埔、查某的監獄內做宣導，需要經過5~6個門，才感受到自由的可貴；進入中學、小學、幼兒園做宣導，會當感受到少年人的熱情佮細漢囡仔的天真；進入社區擺攤仔位做宣導，看到每個人攏真看重家己的健康，這攏是非常好的現象！佇每人的人生存款簿，無論有幾個”0”，上倒爿一定需要1個”1”，這個”1”就是咱的健康啦！抑準，”1”無去啦！全全攏賰”0”！敢猶有什麼意義？
10年前，為著欲參加查某囝的大學畢業典禮，頭一擺家己駛車行過蘇花公路，往回喔！hit時陣猶無雪山磅空，是先行9彎18斡的北宜公路，才上風景嫷但是實在危險的蘇花公路，除了大砂石子車以外，又驚石頭由頂仔落落來，又驚另外一爿是深深的崁跤，一定愛專心駛車才安全‧如果叫我閣駛第2擺，實在講無heh個膽啦！【經過現時政府的努力，雪山磅空開通，蘇花公路改道路段亦完成通車，予來往交通閣較安全又緊真利便；毋過，我亦是毋敢閣駛第二擺。】
10年來，2個查某囝輪流出國讀冊，時間長短無共，亦攏已經順序學成返來，相信[人因]嘛攏有學到想欲學的物件，開闊[人因]的心胸眼界、為人處事的觀點佮態度；另外，2個查某囝亦樹大分枝，嘛由原生家庭的”蜈蚣組”轉為”柺仔組”[華語講2人3腳]，繼續佇隨人人生的馬拉松向前行，嘛希望[人因]的”柺仔組”緊閣轉變為”小蜈蚣組”，順序生湠落去‧【真歡喜囝仔攏完婚囉！阮兩個老的進入空岫期亦升為阿公阿嬤啦！全家做伙時閣較鬧熱溫馨趣味。】
提早換跑道，嘛是為著有較濟時間來陪高齡的老母佮丈姆，雖然講：生、病、老、死是人生路，舊年清明後，91歲的阿母安祥綴著佛祖行，當然是毋甘佮無奈！俗語講：在生1粒豆，較贏桌頂拜豬頭‧真正的，失去的親情是無法度彌補的啦！【丈姆佇2018年3月無病無疼綴著主耶穌的光去天國。】
10年來，國內外遊山玩水，”老伴”老伴，囝仔大漢隨人了後，”牽手”真正是牽手，2人相照顧，”老伴”綴時代改變亦出現新的解說，是老以後會當做伙開講、遊山玩水、相照顧，可能是退休同事、兄弟姊妹、茨邊隔壁、以前的同窗等等，大家攏會老，序細隨人有家庭、事業，咱每1個人攏需要”老伴”，尤其是現此時新時代的”老伴”‧好佳載，牽手同齊行過”珊瑚婚”的”牽手”，健康無問題，兄弟姊妹亦有話講，幾位退休同事嘛定期見面食各一，以前的同窗嘛有定期連絡，所以，這10年來，行過咱台灣的好山好水，去過阿里山佮太平山看日頭出，去過歐洲、美國、加拿大、北海道、韓國、越南、中國等等，只要保持有健康的身體，總會當繼續牽手去遊山玩水啦！【真正世事難料，隨時喝行就行的國內外旅遊，因為全世界武漢肺炎的傳湠，逐國漸漸封城封國境，航空業、旅行社、餐廳酒店、舞廳茶店仔等等，攏受到非常嚴重影響，頭家薪勞攏淒慘落迫，需要政府來救濟；東京奧林匹克世界運動會拖延一年才舉辦。是有史以來頭一次無賣票、無觀眾入場觀賞，開幕閉幕典禮亦是共款。】
10年來，嘛是時間濟，佇這個網路科技發達的環境，綴著少年人的時行，認識電腦的網路操作，一面學一面摸，漸漸嘛揣出心得，會曉收發電子批、上網揣資料，進一步綴少年人建立家己的”部落”[Blog]，寫文章、貼相簿、傳音樂等等，最近又學會曉上”面冊”[英語講Face Book;華語講臉書]，功能閣較濟，效率閣較緊、閣較好，莫怪全世界已經超過5億人每工上”面冊”喔！以人數來講是第3大的國家囉！【網路科技又進步到Line啦！會使即時分享多元化的資訊，古早的千里眼順風耳，有智慧型手機就真利便；講電話省錢省工，又會當同時看著對方，無論國內外任何所在，所以無分年歲，每工逐個攏Line來Line去，增加生活上真濟趣味。】
嘛因為有閒閣對電腦的網路操作有趣味，才半路予人掠入公會管理網站，5年來由舊網頁換新網頁，內容以專業性、活潑趣味性、生活化、服務性為目標，瀏覽人數漸漸增加，10萬、20萬---已經破50萬囉！因為大家無棄嫌，佇全國20外個友會內，風評算是排頭前的，心內嘛足安慰！【公會資訊工課亦轉予少年的來接手，高手少年的閣較厲害，綴著時代開發出公會APP，造福全體會員。】
這10年來，嘛是因為決心換跑道，放棄服務27冬外的日本會社，才予我改變人生的內容，增加非常濟佮多采多姿的領域，享受到非常難得的親情、友情、愛情，維持著寶貴的健康，因為佇日本會社，傳統風氣做法完全無改變，高層幹部只會曉牛椆內鬥牛母爾爾！每年聲聲口口講會照顧員工的家庭，結果將超過45年歷史的工廠俗俗仔賣掉，予真濟老員工提早失業；退休的繼續留落來做顧問援盤[音huann7-puann5]，原本是製造會社，變成真正的”顧門口”會社啦！繼續蹛落去，除了替會社賺閣較濟錢賣命以外，人生其實無什麼特別的意義佮趣味‧
我的個性是：決定代誌前三思而行，選擇以後無後悔‧斡頭看10年前的選擇，猶原是”規叢好好”~~”無剉”[無錯]啦！【這10年來幾仔個老同仁亦先後退休啦！現後留佇公司熟似的老同事賰無幾位，社長亦是閣改轉由總社派來。】
【紲落來的10年，毋知會有什麼變化，總是有夢上嫷希望相隨，上大的嚮望當然是顧好心身靈健康啦！】
留言列表
