台語文：結緣相識超過半世紀－jimmycmlin的部落格

台語文：結緣相識超過半世紀遊子‧2021.10.21

自進入社會食頭路後，時常聽到藥學晚輩談論提到：聽講以前藥學系的分數比牙醫學系、中醫學系閣較懸！這敢是真正的？規欉好好無剉啦！[無錯啦！]佇1960年代阮正是彼時代的見證當事群。當年經過大學聯考的洗禮，來自國內四面八方閣加上港澳馬來西亞僑生，入學時總共有120位有緣者，毋哪分數比牙醫學系、中醫學系較懸爾爾，班上前20名的同學甚至會當進入中部某醫學院的醫科，尤其班上頭前兩名沈同學佮蔡同學甚至會使進入阮共學校的醫學系喔！但是阮攏歡喜甘願樂於進入”南杏”接受”坩堝”的薰陶！

時光飛逝，一目[目聶]已經超過半世紀囉！猶記得咱懷著滿腹歡喜之情初來報到時，踏著黃塗的十全路上，所見的是規排高壓電塔，附近亦有真濟種稻子田佮菜股，遠遠看到較新的校園建築物，心內一陣歡喜，毋過行倚一看卻是”九中”！耶？校門佇叨位？哇！矗立站佇路邊的簡易牌樓就是校門啦！入校門倒手爿的塗角茨是學生餐廳，閣行入去的正手爿看到三列長長連棟的二層樓，就是教室佮實驗室、解剖室，最後一棟較新的三層樓建築物是圖書館、研究室佮辦公室。只有幾排仔懸大的椰子樹佮簡易運動場，會當感受到是校園的感覺。

頭一次感受到著樓梯式大教室，全班120位同學做伙上課，每工欲踏入教室前亦會先鼻到福馬林竄鼻的味。二年級時由楊院長授課的生化課，閣較是醫、藥、牙三個科系幾佰位學生同齊上課，寬寬仔大家也慣勢啦！老師上課時有時陣需用麥克風，坐上尾仔排的同學亦愛帶望遠鏡；老師上課有時用華語、英語佮台語，遇到講台語的盧教授，生藥學佮有機化學時，僑生上頭大，只會當緊練習台語佮下課後借別人筆記來參考。每擺藥用植物學科佮生藥學科的走檯測驗，是真緊張又閣刺激，相信大家攏記持真深‧綴著黃教授的山區藥用植物採集，是沿途趣味閣笑聲無停；實驗課佮體育課的固定分組，予共組的同學感情交流更加融洽；運動場上的田徑比賽、逐種球類活動親像：跤球、網球、橄欖球、桌球、羽毛球等等，佇下課後充滿著青春活力，桌球也有幾仔位國手級的實力喔！另外，墾丁、鵝鑾鼻、東港、旗津海邊聽海湧看日頭落海、大崗山、旗山美濃、大貝湖[現在的澄清湖]、灣仔內夜市、六合夜市、鹽埕埔、愛河畔、15路公車等等，亦攏留下咱同學的歡樂跤跡，至今難忘。

畢業時有108位同學，大多數攏順利經過國家考試提得藥師執照，退伍進入社會，佇士農工商逐種無共領域發展，有出國留學後工作留佇美國、日本、紐西蘭，佇國內也有繼續深造從事研究教學、有進入醫療生技研發佮行銷，公司發展順利也有股票上市、有代理經銷國內外醫療保健藥物食品、有佇藥廠研製服務、醫療保健行銷、病院臨床藥學服務、診所佮社區藥局提供社區居民用藥保健服務、有佇中學做教師等等，殊途同歸就是提供逐層級的醫藥保健服務，教育佮造福大眾。

咱同學中有真濟發展優秀事業有成，佇無共年度亦已經有幾仔位同學得到傑出校友表揚，也有幾仔位同學榮獲全國藥師公會表揚、幾仔位同學榮獲國外研究成果表揚等。

咱同學亦三步五時會來聚會相敘，隨著網路科技的進步，咱同學也抱持終身學習的態度，認真綴著時代的跤步。所以，佇2011年籌備畢業40週年同學會時，整理收集有70位海內外同學的電子批址，續落來也建置有面冊[FB]粉絲專頁佮Line群組，予同學佮家屬會使遀時隨地，無論佇國內外，攏會當提供家己的近況訊息予其他同學同齊分享。

俗語講：有緣千里來相會‧一目[目聶]亦超過半世紀，也祈福予已經去天堂的13位同學；今後大家愛較保重身體健康、快樂慢活，人生下半場有健康才有一切‧

於畢業50週年同學會後有感隨筆。

附記：

台語七字仔詩~~~結緣半世紀~~~遊子 2017.05.23.

一九六七初熟似 ,

東西南北高手來 ;

畢業各行去發展 ,

轉眼銀髮頭頂皆。

服務社會善心態 ,

士農工商職場凱 ;

事業家庭健康顧 ,

安康和樂上實在。