台語文~~~~~雲頂食好料~~~~~遊子 2010.10.23.
看到水藍天頂的白雲，予人感覺心胸寬闊，講到佇雲頂食好料，古早可能只有孫悟空有法度！自飛機發明以後，飛機竄入天頂的白雲，佇飛機內用餐亦算是啦！另外，蹛佇1500公尺以上高山的人，嘛有機會佇雲頂食好料；猶有咱台灣的上懸摩天大樓”台北101”，雖然予杜拜的摩天大樓搶走世界頭名懸樓的名分，亦是有機會享受到佇雲頂食好料的感覺喔！
”台北101”是高度508公尺，地上101層，地下5層的摩天大樓，是「將台北帶向全世界」(Bringing Taipei to the world )的希望工程。佇2004年12月31日舉行大樓開幕典禮起，就是全世界上懸的摩天大樓；佇91樓有戶外觀景台，89樓是室內觀景台，88樓是全世界上大的風阻尼器區，85樓是高空觀景餐廳‧
前幾日仔拄好有餐會，會當進入85樓的高空觀景餐廳，雖然，10外年前有上過台北車頭對面的新光摩天大樓45樓的福華觀景餐廳，以懸度看猶差一大節耶！佇國外旅遊嘛上過紐約帝國大廈[Empire Building]、西雅圖的高塔、多倫多的針塔[Space Needle]、雪梨的高塔、大阪的空中花園[Sky Garden]、札幌的放送高塔等等，毋過，攏是佇頂頭看風景爾爾，佮用餐的感覺應該完全無共款啦！
85樓的高空觀景餐廳有2間：隨意鳥餐廳[義大利菜]佮欣葉食藝軒[台菜]‧阮是訂隨意鳥餐廳，欲入餐廳前需要過幾仔關喔！起頭揣無路，問大樓保全人員，才知影由信義路大門入去，續落由電扶梯到2樓，由餐廳服務人員指示轉坐流籠，先坐2樓至60樓的流籠，出流籠的門，轉坐另外1台由60樓~86樓的流籠，流籠的速度非常緊又閣恬靜，到85樓懸時，耳仔內並無哢哢叫的感覺，真正有夠國際水準啦！無輸紐約帝國大廈的流籠‧
進入餐廳，可能是普通日的中晝時，人客無算濟，逐桌攏是倚窗仔邊，外頭烏陰烏陰，雲層有厚有薄，輪流飄浮過眼前，向外看過去，啊！新光摩天大樓企佇遠遠的雲內，換著角度，看到君悅大飯店親像細的紙盒子，閣換方向，亦看到孫逸仙紀念館金黃色的茨頂，嘛是細細塊仔爾爾！閣再換方向，嘛看到北醫後壁的山佮北醫校園，台北市的交通大道變成水管大，走來走去的車親像番仔火盒‧
大家真好奇，逐所在來參觀看mai，”便所”嘛是予人判定1個所在是毋是有合水準的目標之一，查埔的去”觀瀑樓”，查某的去”聽雨軒”，互相去翕相才來討論參考，實在嘛感覺真趣味啦！查埔的便所，面對著規片像番仔火盒的茨頂，會當享受到由85樓懸將尿旋落去的特別感受，有影是無共款啦！查某的便所，透明玻璃窗大大片，雖然無人會偷看，上加是鳥仔飛過來瞇著，閉事的人有可能驚惶歹勢放未出來喔！
來到85樓的高空觀景餐廳，氣氛景緻是真正讚！大家看到菜單嘛喘大氣，座位基本消費額是每位800箍起，閣加1成服務費；大家隨人注文合口味的菜色‧桌面玻璃杯的水1杯40箍，是義大利進口叫做”芭娜”礦泉水，大家小嘴小嘴儉儉仔[口林]；大部份攏注文”午間輕食”，1人份拄仔好800箍，欲享受較好的就要加錢就好，閣加780箍~1280箍，就會當換牛排、羊排、大排翅等等‧
湯品是2種選1項：羅馬蔬菜牛肉清湯佮法式蘑菇野菌清湯‧
飯前冷盤有冷的7項佮燒的6項，總共會當選1項爾爾‧
主菜有7種來選1項‧
另外附加：米蘭奶油蟹肉沾醬、現烘手工香料麵包、飯後甜點心、飲料等等‧
憑良心講：這裡的料理口味是良心貨換咱的血汗錢啦！
大家哪開講、講笑哪食好料，可能是用別人的拳頭母去撞石獅，食著輕鬆，心內較未疼，毋過，出錢做阿哥仔的人心內按怎想？阮就無瞭解囉！總是非常感謝予大家有這個難忘的經驗，大家通做伙是緣份，應該是歡喜做甘願受啦！一陣閣一陣的笑呵呵‧每上1項菜，隨人提相機翕起來做紀念，窗子外不時有雲層飄浮過去，有時遠、有時近，真正親像佇雲頂食好料啊！
留言列表
