jimmycmlin的部落格

台語文~~~~~難忘的驚惶~~~~~遊子 2010.10.23.
這2工，梅姬風颱無進入咱台灣，竟然照常造成嚴重的災難，受傷的、死亡的、失蹤的，猶原繼續增加中；主要發生佇蘇花公路的山崩路裂，幾仔所在出現水崩山[華語叫做土石流]，幾仔台遊覽車佮小汽油受困未當進退，亦有輾落崁腳的，予人感覺真艱苦‧天災？人禍？運命？實在真歹講‧每擺看到類似大粒石頭由山頂落落來，造成車害、茨損、人傷亡的意外新聞，頭殼內隨浮現出40年前難忘驚惶的畫面！
阮學校佇3年歇寒的時陣，攏照例辦理環島藥廠參觀佮畢業旅行，2台遊覽車，由系主任佮部份老師帶隊，由高雄起行、南迴公路、台東、花蓮，續落行中部橫貫公路，欲到台中轉台北基隆的行程，頭仔2工攏是遊山玩水、看風景，因為藥廠參觀大部份安排佇中、北部‧
歇寒的時陣，是台灣東北季風上強的季節，時常是落濛濛仔雨，濕冷濕冷，阮的遊覽車行過太魯閣磅孔後，陣雨變為有時大有時小，大家照常佇車內，看窗子外的嫷景緻、唱歌的、開講的、目睭keh-keh的、看冊的等等，我是坐佇正爿上頭前hit位，倒爿就是運轉手，因為hit位欲看沿路風景上清楚，應該算是好坐位啦！2工來嘛感覺無毋對耶！
突然間聽到碰1聲！續落車頂亦有khi-khi kok8-kok8的聲，原本車頭前透明的玻璃車窗，出現真濟裂痕，由某1點向四面八方湠開，遊覽車猶原向前衝，經過一兜久仔才停佇路邊；雄雄的意外狀況，我一時亦毋知到底是按怎？双手moh著ann3-le5-le5的頭殼，覕佇椅子邊，只聽到規車的同窗大細聲喝！聽無佇喝什麼？
車停好勢，司機佮系主任叫大家照順序先下車，巡看有人有按怎無？斡頭看後壁，拄仔經過的路上有大小粒石頭塊，哇~!哇~~!!赫尼濟閣有赫大粒的！司機去巡車況，看頭、看尾、看頂、看下、看正爿、看倒爿，好佳載，全班只有受驚惶爾爾，這陣我的心臟猶佇撲撲喘，這陣才知驚，因為規車就是車頭前透明的玻璃車窗，出現真濟裂痕，上嚴重、受損害上厲害，其他幾個所在是稍可仔凹落去爾爾‧
因為車頭前透明的玻璃無破，所以，司機講只有繼續開往台中，才想辦法叫公司調車來換車，位佇深山荒野外，車又閣正常會走，系主任嘛只有同意，叫大家較細膩，坐入原本的位，繼續寬寬仔向前行‧
坐入車內，看著頭前[日支]{唸pit}痕四散的玻璃窗，心臟猶佇撲撲喘無停，心內愈想愈驚惶，我的坐位離玻璃窗只有1手外長，差一點仔撞到我，抑是真正予撞到，這聲就上媒體大條新聞囉！後來我的人生會變成什麼款？實在毋敢想啦！感謝天公伯仔的疼痛，感謝阿爸阿母平時燒好香，感謝阮祖公仔有保庇，感謝眾神明的保佑‧拄仔一目[目聶]的時間，予我閃過鬼門關，我有一種”重生”的感覺！俗語講：天有不測風雲，人有旦夕禍福‧孔子公嘛毋敢接隔暝帖！實在無錯啊！
會記得一年時的國文許老師講”交點論”，伊講咱人攏企佇3度空間中，3項因素是：時間、位置佮咱本身；3項因素攏隨時佇變動，時間是有去無回，位置是無限所在，咱本身嘛是佇有限範圍的無限；生活中任何1件代誌的出現，就是3項因素拄仔好交集做伙才會發生，好事歹事是事後斡頭去看才知影！任何意外事件未當一定去怪天災亦是人禍，講起來攏是運命啦！毋過，利用科學的統計資料亦是有幫助，會當預測未來某1”交點”會出現的結果，可能是歹事亦可能是好事，咱就會當去閃避亦是趕緊去掌握著‧
這40年來，每擺看到媒體報導山區道路落石、水崩山造成意外傷害的新聞，我的頭殼內隨浮現出畢業旅行的情境，這~~~真正是我永遠難忘的驚惶！