jimmycmlin的部落格

莊子講~~~~~自然的簫聲~~~~~遊子
莊子是戰國時代宋國人，名叫做周；bat做過宋國漆仔園的官，和梁惠王、
齊宣王是共時陣的人‧但是，伊的哲學思想主要是來自老子的思想，所以，
後來伊講的話、寫的冊，嘛攏承續老子的講法‧伊寫的冊湊湊有10外萬字，
大部份攏用舉例的寓言式來表現‧伊出的冊有：漁父、盜﹝足石﹞、﹝月去﹞
篋等等‧以kau削、kau洗來看孔子的徒生，對空喙哺舌的學派者，伊嘛看
﹝勿會﹞起，是推展老子的思想為主‧
伊生活佇一個強的欺壓弱的、百姓離散、社會混亂、逐家生活艱苦的時代，
現實的生活是艱苦的，所企的環境就是滿兜位攏有陷阱；伊想講：按呢，埋
佇土地下的賢人，到底算是真偉大的？抑是算是互人看﹝勿會﹞上目的才對？
覺悟了後的莊子，就將伊的眼光、想法由人世間徙開，伊所看到是無窮的時
空‧莊子認為：人一定愛自覺家己的存在，人毋通由別人的標準、決定來畫
出家己‧嘛毋通由過去和未來，畫出即馬‧嘛毋通由無價值來畫出價值，毋
通由由無限來畫出有限，做出自我限制；嘛毋通由死亡來畫出生存，才會當
超越束縛，得到自由，盡量去發揮‧
所以，莊子的哲學是自由思想的哲學‧是將性命囥入去無限的時間和空間內
底，去實在好好仔體驗的哲學‧世間人的生活，佇莊子看來是“無性命的順
序”，莊子所追求的是“有性命的無順序”‧
佇春秋戰國時代，嘛是思想和行動，百家爭鳴的時代，莊子的哲學是教人變
做卡巧的自由思想，和君王專制叫人服從的思想相對反，相衝突，所以，掌
權者攏刁工無愛互一般百姓了解，但是，掌權者嘛毋敢將莊子的思想哲學放
sat掉‧
後擺起，就漸漸來貼出莊子講的話、舉的例，互逐家來參閱雅正‧