jimmycmlin的部落格

新聞辭典~~~~~熱錢亦叫游資~~~~~遊子 2010.10.18.
咱時常佇媒體看到世界無共所在的經濟活動輪流波動，高低相差非常大，親像大水的竄流，東西南北無一定，來亦緊去亦緊，予被經過的所在造成傷害，這攏是世界性的熱錢所引起的‧什麼是熱錢？
熱錢[Hot money] 亦叫游資[Refugee capital]，就是指投機性的短期資本，為著追求上高的報酬，佇國際金融市場走竄，快速流動的投機性的短期資金‧
操作投機性短期資金的人，眼光真利，做決定真殺，一旦揣到短期投資機會，大把資金隨拼入去，如果真緊得到利頭，抑是，發現原本投資機會已經欲失去，又隨將大把資金徹走‧
熱錢的投資性質佮投入時間點，有時對投入地區的經濟活動發展，有正面刺激性的幫贊，造成投入地區的較繁華鬧熱；毋過，熱錢傷過頭濟，顛倒引起負面的影響，親像：物價起、錢變薄的通貨膨脹，匯率劇烈變動、膨風的投機風氣時行，寄銀行無利息，大家將銀行存款提出來參加青瞑投資等等，這攏是短期內無法度解決的問題‧
有1工，操作投機性短期資金的人，已經賺甲油洗洗，抑是，發現原本投資機會漸漸欲失去，就將利頭結算，又隨將大把資金徹走，將一大堆問題留予被投入地區的政府佮百姓‧
所以，熱錢予人的印象，對一般人來講是：生雞卵無，放雞屎有爾爾！對投機者佮投資者來講是：亦愛亦驚啦！親像捏驚死、放驚飛，毋知是毋是會變成上尾隻鳥鼠啊！