用藥保健~~~~~癩膏病(Leprosy)與樂生療養院~~~~~遊子
為著起台北市到新莊的捷運系統，bhue將佇迴龍地區的樂生療養院拆除廢掉，
互真濟人感覺毋甘，多方面爭取，看是毋是會當盡量保留落來‧樂生療養院是
日本殖民時代，所起來收治癩膏病(Leprosy)患者的所在，佇韓國是小鹿島更
生園，佇台灣就是樂生療養院，佇日本國內另外有13間類似的療養院，患者佇
癩膏病(Leprosy)嘛叫做痲瘋病，日本人將伊叫做漢生病(Hansen)‧是由癩
菌(痲瘋桿菌)感染來的，感染到的病症特徵是：互神經麻痺和皮膚的病變，互
邊仔人看著真驚，以前醫學資訊無發達，攏認為是患者做什麼天譴的歹代誌，
才會得到癩膏病，日本政府將漢生病看做真可怕的傳染病，尤其hit當時猶無
特效藥通來治療ziah的患者，才起病院對患者強制隔離‧其實，即馬醫學進步
，知影癩菌的傳染力和發病力是弱弱仔，佇日常生活中無可能傳染到，抑準不
幸感染到，嘛會當用適當的藥物完全治療好‧和患者是毋是有做什麼天譴的歹
代誌，無關係啦！
樂生療養院是台灣第一間公立的痲瘋病隔離病院，設立佇1929年昭和時代，內
底的建築物嘛會當算是古蹟囉！病院內底的患者，是照戶籍地來區分，所以會
看到台南舍、高雄舍、台北舍等等‧嘛有一部份是軍人身份的患者，為著控制
痲瘋病的傳染，日本和後來的台灣政府攏對院內的患者採取終身隔離、禁育等
政策，上濟時陣收容達到1118人喔！到即馬，猶原賰有300外個行動不便的老
患者，平均歲頭嘛有74歲囉!
最近嘛有看到日本的律師團，來到台灣訪問痲瘋病院內的患者，準備bhue替台
灣和韓國的患者，過去受到日本政府無人道政策，強制隔離、禁育‧互即類的
患者，長年受到茨內人和社會地區的放sat、排斥和遺忘‧造成患者真大的傷
害，一直過著悲慘的日子‧來向日本政府要求賠償，抑是會當成功，嘛算是遲
來的正義啦！
另外，一陣有正義感的人，嘛一直佇走zong，希望會當爭取保留院舍建築物，
mai互台北市捷運局來拆掉，院區環境經過整理，好好仔規劃，適度的整修，就
會當轉變做全世界唯一的痲瘋病人文史料紀念館，暫時號做：樂生漢生博物館‧
互後代的子孫會當了解，一項錯誤的衛生公共政策，做成赫濟家庭破碎，提醒做
決策人好好仔省思‧
留言列表
