jimmycmlin的部落格

新聞辭典~~~~~草食男佮肉食女~~~~~遊子 2010.10.17.
佇媒體有時會看到”草食男”佮”肉食女”的詞，這到底是什麼意思？佮食葷、食素有關係無？
其實草食男佮肉食女這2個詞，上早出自日本坐家深澤真紀的作品，伊是針對現此時社會生活中，觀察到查埔佮查某的角色無共囉！傳統上一般人攏認為查埔應該是非常勇健、願意負責任、做穡認真打拼、凡事比較較主動；認為查某應該是較溫柔、溫順、需要人來疼惜‧毋過，草食男佮肉食女的意思完全佮傳統的印象顛倒反喔！
草食男是指1980年後，一寡仔查埔人性格溫吞、未主動、驚受傷害、對人對事攏無願意擔較濟責任、做穡較無法度食苦、較無法度抵抗壓力；親像這款查埔人，對愛情佮事業攏是無膽、勼勼未得等、未做先認輸，予人感覺親像草坪的食草動物，講好聽是溫馴、無危險性‧
換來看肉食女，全世界的查某人，一方面是受教育機會平等、提升智識、增加智慧、經濟獨立，尤其受到美國真時行閣受歡迎的電視影集”慾望城市”[The City of Sex]的鼓舞影響，20世紀尾仔開始，新世代少年的查某囡仔，變成主動去追求事業、愛情佮性愛的享受，無欲閣予傳統禮俗來束綁，古早講查某人khiang3-腳並毋是真正佇o-lo2，現此時為著爭取家己的幸福佮權利，無khiang3-腳顛倒是未用哩！
全世界漸漸看到愈來愈濟的草食男佮肉食女，其實佇中國的上海是查某人捍[唸hiann7]-家上出名，是草食男佮肉食女上普遍的所在啦！