(法蘭克福的大車頭)
台語文~~~~~東歐遊記~德國(7)~~~~~遊子 2009.05.25
上尾工是自由行時間，除非你有親朋好友佇遮會使陪你四界徙，亦是你有
法度家己安排行程，抑無，欲拜托導遊tshua7-路，需要額外自費每人交
90歐元，包括規工的所費，有逐種交通工具、中晝頓、暗頓佮小費，逐家
來到講德語生疏的所在，只有1對留學過美國的少年翁仔某無參加，賰的
亦是乖乖仔繳錢綴行啦！因為阮人少，又閣有在地的德國仔導遊Albert
san，決定無欲坐遊覽車，換坐在地的逐種公共大眾交通工具，逐家攏感
覺機會難得，全員贊成啦！
(月台之一)
透早雖然淡薄仔冷，毋過算是好天啦！Albert san先tshua7逐家坐電車
到法蘭克福的大車頭(Frankfurt Main Station)，親像咱的台北火車
頭啦！大車頭的建築物是真有古早味，車頭亦有出租的腳踏車，德國的環
保概念佮替代能源的落實去做，佇全世界是排頭名的啦！外頭的建築物看
起來雖然古古仔，車頭內非常大、非常開闊，候車室、月台、賣店、服務
處等等，比咱上大的台北火車頭閣較大幾仔倍啦！旅客來來去去，行東往
西，人濟袂亂糟糟；比誠品閣較大間的冊店，腳踏車嘛會當綴主人牽入去
喔！
(葡萄園佮酒莊)
準備上車往另外1個城鎮Rudesheim，聽講德國的任何公共大眾交通工具
攏一定真準時起行到位，今仔日就來親身試看mai啦！前仔的電車有影是
準時到位佮起行，這班火車嘛是準時準時起行佮到位，因為是標準闊度的
鐵枝仔路，車廂比咱台灣的較闊，車廂內嘛真清氣‧
Rudesheim是萊茵河邊山坑仔出產葡萄酒的所在，所以酒莊佮葡萄園非常
濟，萊茵河全長1300外公里長，流過源頭的瑞士、奧地利、荷蘭佮德國4
國，由德國出海，佇德國境內上長有800外公里長，自古双爿的大小城堡
有1800外個，每個城堡攏有無共的歷史故事，古早的戰爭就是堡主間的相
爭引起的；Albert san先tshua7逐家沿著河岸哪欣賞嫷景緻哪徙街，來
到出名的觀光街The Thrush Street，紀念品店、酒莊佮餐廳等等，無
共造型大小的咕咕鐘，紅酒、白酒、紀念酒，手工藝術品等等，予人看甲
目睭無nih‧
(德國大醃腸)
導遊安排逐家先入去酒莊，聽紹介紅酒、白酒無共口味後，每人會當試
[口林]，續落有趣味的人買酒，酒莊頭家特別為你用電動刻刀為你刻字亦
是圖樣做紀念，這嘛是真有用腦筋的生理步數喔！聽到會使刻字亦是圖樣
做紀念，逐家嘛是加減看加減買啦！中晝頓亦就踮這間酒莊的餐廳用餐，
特別安排德國豬腳佮德國大醃腸，2項選1項，另外是紅酒、白酒、麥子酒
3項選1項，食飯時亦有3人的樂團走唱，稍可仔親像以前北投的”那卡西”
(Nakasi)，嘛有唱台灣歌曲喔！感覺袂[禾黑]啊！
(坐船遊覽萊茵河)
續落去，3年前坐船遊覽Koblenz到St.Goar(585~560
Km) hit段，這擺是Rudesheim到Assmanns Hausen(525~535Km)這段
，比較起來頂擺的時間佮路程攏較長，沿岸的大小城堡較濟，風景較有變
化較嫷，毋過，對頭一擺來坐船遊覽萊茵河的人是無什麼精差，猶原感覺
非常嫷，每1個定格的畫面，攏親像曆日仔頂面的圖樣，用相機hip袂停‧
繼續落船閣換坐火車由小鄉鎮的Bingen到省都的Mainz市，這次是坐著双
層車廂，感覺又是無共；Mainz的車頭雖然比法蘭克福的較細，毋過猶原
比台北火車頭閣較大，Mainz市總是省都，有歷史有規模嘛是應當的啦！
佇Mainz市停留徙街時間無濟，繼續閣坐火車由Mainz市返到，法蘭克福
鬧熱的市中心，百貨公司、餐廳、銀行等集中地區，上懸大樓才30外層爾
爾，peh上百貨公司的10樓尾看過，市內建築物有新有舊，原來是大戰中
受到嚴重破壞的才許可重起，抑無，是以保留原建築物為原則，所以，才
會當佇社會發展時同齊保留著有歷史意義的建築物，這嘛是無簡單‧
(双層火車)
今仔日干哪看導遊買1擺票爾爾，阮坐到3種火車、2擺電車佮坐船，原來
導遊是買1日遊總包的團體票，佳在毋是又閣坐霸王車，雖然佇進出電車
佮車站攏無人驗票，佇火車頂有隨個人查票喔！抑準走票予人掠到是罰真
正重啦！原則上是信任老實為原則；另外，逐種公共大眾交通工具有影攏
確是真正準時，這嘛是咱台灣需要好好仔學的所在‧
(走票予人掠到是罰40歐元)
留言列表
