jimmycmlin的部落格

用藥保健~~~~~輕粉誤用會中毒~~~~~遊子 2009.05.30.
輕粉亦叫做汞粉、水銀粉；伊的化學名是氯化亞汞(Calomel;Hg2Cl2)，
外觀是白色、有光澤的鱗片樣、嘛可能像雪花結晶的粉，無臭味，藥性屬
於辛、寒、有毒，歸屬大腸佮小腸經‧
輕粉佇中醫外用主治殺蟲佮攻毒，主要用佇疥瘡(生疥)、頑癬佮濕疹，抹
上患部；內服是用佇排痰、消積佮逐水通便，毋過，毋通秤採來內服，尤
其有身的查某人絕對禁止服用‧
使用的藥量傷濟、過量亦是傷久，攏會造成水銀中毒，急性中毒的症頭有
：急性腐蝕性胃腸炎、壞死性腰子病、周邊循環衰竭等等，患者的喙內感
覺有金屬味佮hiam-辛感，喙內黏膜會紅腫、喙焦、想欲吐、腹肚痛亦是
大便參有血膿、尿量少、呼吸困難佮中毒性腰子病，上嚴重時會造成死亡
；慢性中毒的症頭有：喙內病變、消化系統病變、神經系統病變佮精神無
正常等等。
所以講：藥就是毒！絕對毋通家己胡亂食藥‧咱政府舊年(2008)起嘛已
經禁止傳統式水銀磅針的製造、販賣佮使用，就是欲預防消費者無小心引
起水銀中毒啦！