jimmycmlin的部落格

用藥保健~~~~~海綿狀血筋瘤~~~~~遊子 2009.06.06.
媒體報導：咱台灣的醫術讚！阿富汗的患者跨海來求醫，超大的海綿狀血筋瘤，經過3擺的雷射手術，將伊治療好啦！
咱一般人所講的海綿狀血筋瘤佇醫學上叫做靜脈畸形，主要是靜脈血筋壁的神經發生缺陷，引起靜脈血筋壁拄到壓力增加時，會繼續擴大充血，到尾仔予無正常的靜脈血筋腫大甲親像瘤共款‧
這種海綿狀血筋瘤可能出現佇咱身體的任何部位，攏無一定所在，亦是出現佇喙舌，除了平常時定定會去咬受傷流血以外，因為體積變大，亦會影響到喘氣、poo7-物件、吞嚥、講話發音等等，出現比正常人較艱苦的情況‧如果出現佇面的五官，除了影響到外觀以外，嘛會影響到五官的相關功能，所以，猶是愛予醫生診斷佮治療才是‧
傳統上對靜脈畸形的治療方法包括有：放射線療法、栓塞療法、固定式縫合療法、以外科手術割除療法等等‧目前較新、較進步的治療方法是：病灶內雷射光凝術，較常使用的雷射包括有：二氧化碳雷射、氬雷射、染料雷射等等‧
利用雷射將能量引入去病灶底，破壞病灶部位的細胞後，等組織慢慢仔恢復正常，膨起來靜脈血筋嘛恢復正常‧一般治療效果由60%~100%，平均是85%，毋過，過一段時間病灶的部位亦是有可能閣復發‧