jimmycmlin的部落格

用藥保健~~~~~黃疸~~~~~遊子 2009.06.13.
拄仔出世的嬰兒時常有黃疸症頭出現，有時連續幾仔工，嚴重時可能需要暫停飼母奶，亦需要治療，才未引起後遺症‧為什麼會出現黃疸症頭？
佇咱體內的紅血球(RBC)老化代謝會產生膽紅素(Bilirubin)，經過肝臟處理後來排出體外；如果紅血球代謝傷緊亦是肝臟細胞發育未熟，無法度順序處理膽紅素，傷濟、過量的膽紅素會積佇皮膚佮黏膜，引起皮膚變黃，所以，只要代謝的過程中任何一個所在出問題，攏有可能造成黃疸‧
拄仔出世的嬰兒因為血內紅血球的濃度較懸，產生膽紅素較濟，而且，肝臟細胞發育未熟，無法度順序處理大量的膽紅素，所以，較會出現黃疸‧有時佇第2工開始出現，到第5~6工時上厲害，續落才慢慢仔減輕退掉，如果黃疸指數攏佇正常範圍內，就毋免特別治療，抑是，黃疸指數傷懸無正常，就需要進一步檢查佮治療，看是毋是：母子血型無共引起溶血、紅血球內欠缺某一種酵素(俗稱蠶豆症)、新生兒感染、肝膽病症等等‧
只要早期發現，量早接受適當治療，就會使避免遺憾的不幸事誌發生‧