(B.M.W.3條大橋)
台語文~~~~~美加東旅遊記(5)/世界的大蘋果New York紐約~~~~~遊子
來到21世紀的地球村,全世界人口超過1000萬的大都市已經有幾仔個,包括:New York
紐約、Tokyo東京、Shanghai上海、Seoul首爾、Rio De Janeiro里約熱內盧、Paris
巴黎等等,毋過,猶原是紐約上出名,可能是全世界頭一個千萬人口的大都市,又閣是世
界聯合國總部的所在,自早到今一直予人叫做世界的大蘋果‧
(曼哈頓的摩天大樓遠眺)
全世界的城市一定攏倚著大條河亦是大海的港口,紐約由B.M.W.3條大橋來結做伙,
Brooklyn布魯克林大橋、Manhaton曼哈頓大橋攏是規工車輛過來過去非常無閒的大橋,
日時市內的交通無分上下班,隨時攏嘛塞車啦!摩天大樓真正濟,新舊的建築相交參,逐
色人種攏有,過路人行路的跤步攏真緊,表示踮遮的人生活較緊張無閒啦!
港口坐船去自由島看自由女神的雕像是觀光客一定有的安排,企懸懸的自由女神雕像,予
古早行船的人,佇遠遠的海面看到,就知影紐約到囉!自由女神雕像是美國獨立建國後,
由法國起好來相送,表示自由佮夢想;聽講頭一個自由女神雕像做好時,法國人家己認為
雕刻了有夠嫷,毋甘送出門,顛倒留佇家己國內,企佇巴黎賽那河中的小島,真實的喔!
2年前去巴黎賽那河坐船遊覽時有看到;後來,法國才閣重雕刻好1座來相送,時間一拖
10年,由1876年拖到1886年,由獨立100年的慶祝禮變成110年,總是意思夠就是啦!
自由女神的雕像懸45.5公尺,美國佇下腳先起1個46公尺懸的基座,所以,tshai7好的
實在懸度達到91.5公尺,四箍輪轉闊闊,遠遠就看會到,遊艇倚岸,逐家上島行行遊覽,
看過對岸摩天大樓上濟就是Manhaton曼哈頓區,踅到自由女神的雕像下仔,由無共角度
攝相做紀念,有時間的遊客嘛會使另外開錢買票(足百)去自由女神的雕像頂參觀‧
帝國大廈懸102層,佇1929年開始起,速度非常緊,2年左右就完成,一直到1973年才予
双子星摩天大樓拼過,毋過,佇”911意外事件”中,双子星摩天大樓又閣變成平地,雖
然,美國企業有規劃踮原地重起新的地標摩天大樓,袂起好進前,帝國大廈猶原是紐約上
懸的摩天大樓,是觀光客必遊行程之一,有時愛排1~2點鐘才有法度輪到;嘛因為”911
意外事件”的關係,欲參觀帝國大廈的安全檢查佮坐飛機的話檢查共款嚴格,避免恐怖份
子閣來製造事故,雖然感覺麻煩,為著安全設想,逐家嘛攏接受‧坐流竉分做2段,先由
2樓直達到80樓,才閣換1擺流竉去到86樓,流竉的速度真緊,無輸佇多倫多的西恩塔
(C N Tower),稍可歹運,到86樓時拄到底親像台灣的西北雨,風大雨大佮彈雷公,好
佳載,過了10鐘雨細雲開日頭出,哇~~!室內客滿的觀光客隨tsong5出去看風景,東西
南北有無共的景緻,雖然目前全世界上懸的摩天大樓是”台北101”,毋過,阮猶毋捌去過
,干哪去過56層的新光摩天大樓,所以,這次算是來到上懸的所在,感覺真歡喜嘛無簡單
啦!毋通近廟欺神,近溪搭無船,返來台灣了候,嘛愛揣時間去”台北101”看看才是,因
為”台北101”算是咱台灣的驕傲啊!
Wall Street牆仔街,華語翻譯為華爾街,其實伊是古早移民的荷蘭人為著對抗移民的英
國人,起1爪牆仔來做保護的作用,現此時猶原保留有牆仔的痕跡做古蹟來見證;古早的荷
蘭人真gau5做生理,這條有牆仔的街頭街尾攏真鬧熱,到尾仔變成銀行證券行集中的所在
,2次世界大戰後,取代英國倫敦變成世界金融中心,一直到即陣攏是世界金融的大阿哥‧
其他高級精品名店佮百貨公司上濟的第5大道(5th. Ave.)、每年聖誕節攏tshai7真懸真
嫷聖誕樹的時代廣場(Times Square)、插滿世界各國國旗的洛克斐勒廣場、電影館排長
龍的百老匯(Broadway)、林肯音樂藝術中心、大都會藝術博物館(The Metropolitan
Museum of Art)、南街海港市場(South Street Seaport)、非常寬闊的中央公園
(Central Park)等等,毋是三二句話就講會煞,世界的大蘋果實在是處處充滿活力佮機
會的所在,才會繼續吸引世界真濟人來發展討食,毋過,只要肯拍拼,相信處處有機會,
咱台灣嘛是好所在啊!
全站熱搜
留言列表