台語文~~~~~美加東旅遊答答滴滴的感想(6)~~~~~遊子
(1).Quebec(魁北克)欲獨立的做法：
Quebec是加拿大的國中之國，加拿大全國是講英語寫英文，佇魁北克省是講法語寫法文
雖然，加拿大政府公告英語法語為國家通用的語言，英文佮法文併列佇公文書，毋過，
魁北克省的人猶原想欲家己獨立做1個國家；佇1980年佮1995年辦理過2擺魁北克省的獨
立公投，第1擺36%外，第2擺49%外，差無夠1%就過半數通過，因為法律規定共1個議題
無通過，需要經過15年才會使閣提議，所以，第3擺獨立公投愛等到2010年，嘛欲到囉！
加拿大全國真正有包容性，講英語佮講法語的族群嘛互相尊重，毋管獨立公投有過無，
逐家照常和諧生活做伙，無暴力、無暴動，講法語的人嘛做過加拿大政府的總理，這實
在是咱台灣的族群需要學的所在‧
佇魁北克省的路標、公共場所等等，真少看到英文，佇觀光地區才有看到英文佮法文併
列，有聽到講英語，魁北克的人就是由日常生活中完全保持講法語寫法文的傳統方式，
予人一踏入來隨感覺佮講英語寫英文的所在無共，準做獨立公投無過，照常堅持按呢做
落去，相信mai去予講英語寫英文的族群同化去，相信有1工獨立公投一定會通過啦！可
能2010年就是機會喔！這嘛是咱台灣人需要好好仔學的所在‧
所以講，自2000年開始全國認真推展台灣的母語教育是偌仔重要的政策，語言是傳承族
群文化歷史的工具，工具無去，族群的文化歷史就親像一pha火會漸漸hua去，族群的人
嘛變成無根的人共款啦！咱台灣人一定需要好好仔學魁北克人的做法，堅定、堅持、溫
和、有目標、有理想，逐家團結做伙為後代囝孫拍拼啦！
(2).由世界無共所在的入聲地名來看：
咱台灣閩南語有入聲，這是自古早保留傳落來的，佇咱台灣的地名，由原住民的平埔族
留落來 ，其中有入聲的真濟，親像：台北(Tai5-pak)、鹿港(Lok8-kang2)、中壢
(Tiong-lik)、新竹(Sin-tik)、沙鹿(Sua-lak8)等等，佇世界無共國家所在的地名
，嘛有看到真濟有入聲的地名，嘛攏是原住民族留落來的，親像：日本的Hokkaido(北
海道)、
Sapporo(札幌)、Wakkanai(雅內)；加拿大的Ottawa(渥太華)、Ontario、Battle、
Tuktoyaktuk、Coppermine等等；美國的New York、Portland、Atlanta、
Pittsburgh、Seattle、Oklahoma等等；泰國的Bangkok(曼谷) 、Pattaya等等；
越南(Vietnam)的Thanh-hoa等；馬來西亞的Malacca(麻六甲) 、Sabah(沙巴)等；
印尼的Telukbetung、Balikpapan、Sarawak等等；瑞典的Stockholm(斯德哥爾摩)
、Gotebprg等等‧相信猶有真濟我毋知的所在‧由入聲的地名來看，世界上早話語的
源頭有可能是相共的啊！
佇目前保留的入聲韻愈濟，表示愈代表源頭的正統性喔！按呢，咱台灣閩南語實在是真
寶貴啊！咱是毋是愛閣較來保惜、推展，予伊永遠留傳落去‧
(3).行萬里路較贏讀萬卷冊：
天文、地理、人文、風俗、社會傳統、生活習慣、飲食料理、歷史、景緻、科技、建築
物等等，親身行過、看過、摸過、食過，感受到是實在的，必然是比干哪看冊閣較讚啦
！親像：Niagara Falls大水淌、比台灣島閣較大的湖、半工內的氣溫由4度到23度、
大沙漠、鼻孔袂烏的空氣、半年以上結冰落雪的地區、和諧的族群相尊重做伙等等，攏
是蹛佇台灣的人想未到的代誌，生活富裕守法的國家社會、生活散赤亂七八糟的國家地
區，去過了後，自然會感覺到咱台灣好的所在佮需要繼續拍拼改進的所在‧
所以俗語講：行萬里路較贏讀萬卷冊‧有影是規叢好好~~無剉(無錯)啦！
留言列表
