jimmycmlin的部落格

(相片後面有孔穴大石頭就是珍奇石鐘)
台語文~~~~~珍奇石鐘~~~~~遊子 20090306
會記得2年前去上海遊覽，去到上海豫園佚佗，看到1粒大石頭企佇水池子內，規粒攏是孔穴，有規丈懸，導遊解說時講：這粒叫做龍王石，由鄱陽湖搬遷來遮，由上頂懸灌水入去，每一個孔穴攏會流出水來，表示孔穴攏有相通，佇大風大雨時，會發出鑼鼓陣的樂聲，非常寶貴神奇，所以，予人號做龍王石‧
當場逐家聽著霧煞煞，亦無現場聽到鑼鼓陣的樂聲，毋知伊講的到底是毋是真正的？總是出外遊覽親像欣賞走馬燈，一目[目聶]就過去啦！
最近河洛語組的研習，讀到”古文觀止”第十一卷宋文篇內蘇軾的文章”石鐘山記”，予我愈讀，佇頭殼內愈出現1粒大石頭，感覺蘇軾的文章所描述的情境，親像有印像喔！慢慢仔想著去上海豫園佚佗的情形，揣出當時的相片，無毋對啦！導遊所講予人號做龍王石的大石頭，就是”石鐘山記”所寫的主角啦！
蘇軾的文章寫著非常對筒，掠到茅割，因為伊佮伊的長子邁，佇月娘清明的暗時，同齊坐船來到所傳說的石鐘山腳，船行到絕壁下，夯頭看到邊仔是千尺懸的大石，大石的外形親像猛獸奇鬼，亦親像佇陰森的烏影中欲掠人，覓佇山頂林仔內的[骨鳥]鳥，聽到人聲亦受驚惶飛起，佇天頂磔磔叫；嘛親像有聽到老大人咳嗽的聲佮笑聲，來自山谷內，有人講彼是鸛鶴叫的聲啦！佇幽靜暗暝的船頂，看到佮聽到的情境，予人心內會驚惶，想欲斡頭徙倒返去‧突然間聽到真大的聲響來自水面上，大聲甲親像無停的鑼鼓陣‧撐船的船夫感覺真驚惶，毋過，寬寬仔斟酌看，大石的外壁攏是大大小小的孔穴空縫，無法度知影伊的深淺，水湧一波一波沖入孔穴空縫，水波無停去衝擊石頭孔穴空縫，所以，才會發出無停的鑼鼓陣樂聲‧船仔行佇兩山間，閣看到另外1粒大石頭企佇水流的正對中，石頭頂會使坐規百人的款，看起來亦是中央空空，外頭有真濟空縫，天頂的風佮水流的水波，一陣一陣輪流佇孔穴空縫出出入入，發出親像廟寺的鐘鼓聲，佮前仔的鑼鼓陣樂聲相呼應，真正親像大型樂團的演奏‧
所以，揣到真相的源頭，心內非常歡喜的蘇軾對伊的囝講：你知無？鑼鼓陣樂聲就是周景王的無射鐘啊！廟寺的鐘鼓聲亦就是魏莊子吊懸的歌鐘啊！古早人所講的情境實在是無騙人的啊！只是一般人無法度親身去感受到，秤採揣寡理由想講準做真相，抑是，撐船的船夫，雖然，有機會去親身感受到情境，毋過，無飽學去描述清楚，知而不能言，所以，無法度傳到後世‧
由蘇軾的描述，印證著導遊的解說，予我確實認定予人號做龍王石的大石頭就是”石鐘山記”所寫的”珍奇石鐘”啦！