jimmycmlin的部落格

新聞辭典~~~~~連記制佮單記制~~~~~遊子 2009.03.08
逐鄉鎮農會的選舉又開始囉！買票賄選綁柱子腳的情形亦出現啦！地方派系為著隨人的利益，拼甲我生你死，無暝無日；目前農會的選舉是採用”二分之一限制連記制”，這到底是什麼意思？
咱一般的選舉分做連記制佮單記制，民間社團公司股東會等等的選舉，以往大部忿是採取連記制；政府的中央佮地方選舉以單記制為主‧兩項到底有什麼無共的所在？有什麼精差？
連記制：是1張選票會使同齊圈選真濟位的候選人‧會當圈選的人數佮應選人數平濟，叫做全額連記制‧會當圈選的人數比應選人數較少時，叫做限制連記制‧限制連記的比率愈低，對想欲控制掌握全局的大派系愈不利，就無法度規盤捧去食啦！
單記制：是1張選票干哪會使圈選1位候選人爾爾‧抑是，圈選超過1位候選人，會予人判定是無效的廢票‧
親像講：佇全額連記制的選舉，多數派系只要控制掌握全部有效票數的一半以上，所推荐的候選人就會當全部當選；抑是，採用二分之一限制連記制，多數派系需要控制掌握全部有效票數的三分之二以上，所推荐的候選人才會當全部當選；抑是，採用參分之二限制連記制，多數派系需要控制掌握全部有效票數的四分之三以上，所推荐的候選人才會當全部當選；照按呢去推算‧
民進黨執政後，為著避免農會的選舉予地方派系控制著，佇2000年12月30日修改” 農會選舉罷免制度”，將自起頭一直採用的全額連記制改變為二分之一限制連記制，減少地方派系控制著鄉鎮農會的嚴重性，雖然，效果毋是真好，改革的腳步總是有踏出一步，改革當然是愈緊愈好啦！