jimmycmlin的部落格

台語文~~~~~1碗湯麵~~~~~遊子
會記得幾仔年前，看到1篇佇日本流傳的報導，予人看到感覺真感心佮受感動‧講著：在日本真寒的北海道
札幌(Sapporo)的事誌，有1個單親的母親，因為伊的翁婿車禍死亡，造成欠人的錢，生活真艱苦，佇舊曆
過年暗，帶著2個後生，行佇札幌的街仔路，入去1間準備欲收攤歇睏的麵店仔，坐好以後，母仔囝3個人干
哪注文1碗湯麵爾爾，麵店仔年歲無細的頭家和頭家娘看到嘛真不忍心，頭家娘就對伊的翁婿講：咱加煮1碗
來請in食好麼？頭家講：毋通按呢做‧不過，頭家佇下麵落鼎時，恬恬仔將麵條囥双份落去，煮好捧出去，
是1碗滿滿滿、芳芳芳佮燒燒燒的湯麵，予in母仔囝3個人食著真歡喜佮真溫暖‧後來，連續2年的舊曆過年
暗，共差不多仔時間，in母仔囝3個人準時來到位，麵店仔的頭家嘛共款照按呢做‧但是，後來幾仔年的舊
曆過年暗，攏無搁看到in母仔囝出現，麵店仔的頭家和頭家娘，共款恬恬仔攢好桌仔位，等in母仔囝來食麵
，麵店仔的頭家和頭家娘的愛心，變成in過年儀式的一部份啦！過了15年後的舊曆過年暗，共差不多仔時間
，入來2個穿著真體面的查埔人和1位穿高雅和服的中年查某人，一入門，in母仔囝3個人就真有禮貌磕頭，
向麵店仔的頭家和頭家娘說多謝講：感謝in翁仔某佇18年前予in母仔囝3個人的溫暖關懷和照顧，予in母仔
囝3個人受到溫暖鼓勵，才無想﹝勿會﹞開，才會當勇敢奮鬥拍拼落去‧即時陣，麵店仔的頭家兩翁仔某，目
箍紅紅，才認出來in就是過去每年的舊曆過年暗，恬恬仔欲等待的人，目屎已經流出佇in 5個人的目箍仔外
，什麼話嘛講﹝勿會﹞出來囉！
前幾工佇自由時報的頭版，嘛看到1則類似感人的”1碗湯麵”‧1對翁仔某和5的囡仔的散食家庭，老母得到
癌症入院，老爸工作無固定，5的囡仔佇病院陪伴老母，定定是有1頓無1頓；病院的醫護人員和社工人員看到
攏真毋甘，有時陣會帶卡大漢的3個囡仔去食麵，每擺叫3碗湯麵，不過，3個囡仔攏同齊食1碗湯麵爾爾，社
工人員看到感覺真奇怪，就開喙問講是按怎3個同齊食1碗湯麵爾爾？上大漢的阿姊應講：另外2碗湯麵欲帶轉
去予阿爸阿母食‧企佇邊仔聽到的人，攏感覺非常感心，受到感動‧即個消息予記者知影後報導出來，嘛予台
灣社會真濟人受感動，有人寫批、有人拍電話問好，有人匯款、有人寄現金袋仔捐助，嘛有人專工去到病院慰
問、捐款‧不過，人窮志不窮，in兩翁仔某一方面真感謝台灣社會赫濟人予in的溫暖關懷和鼓勵，但是，in
認為比in更加需要捐款幫助的人一定猶真濟，所以，in感謝善心人士的好意關懷，謝絕善心人士的捐款‧佇
赫尼阿艱困的環境，存有遮闊的腹腸‧大人和囡仔的行為攏真正受人感動！這個家庭正經是做到“人飢己飢，
人溺己溺‧”的地步啦！實在有夠予人真感心啦！
“1碗湯麵”看起來是簡單簡單，不過，佇日本和台灣攏展現出人性好的一面，有影愛心是無分國界的；對社
會教育、對學校教育，攏是真正好的實例教材，值得咱逐家來學習‧
註：到目前為止，無法度退回的善款達到169萬外，因為即個老母是癌症尾仔期，來日無濟，所以，南投縣政
府決定替in保管，成立這5的囡仔的教育基金，予這5的囡仔會當順序好好成長，才﹝勿會﹞辜負赫濟善心人
士的好意關懷‧