jimmycmlin的部落格

台語文紀念228~~~~~台灣的過去佮未來~~~~~遊子
兩粒原子彈投落去日本的本土，予第二次世界大戰隨後就結束啦！
台灣人想講欲出頭天囉！無想到：走了熊，來了豹‧
自起頭就歸喙專騙步，予台灣人顛倒愈來愈悽慘‧
1947年的228事件，是台灣歷史頂上悲慘的事件！自228事件以後，
台灣人受到戒嚴統治，實行黨禁、報禁，控制台灣人的言論自由、遷徙自由‧
喝什麼反共抗俄、反攻大陸、漢賊不兩立、實施憲政等等，攏是騙步啦！
暗路行久，自欺欺人，後來予聯合國趕出，心頭驚惶才來喝出：
莊敬自強，處變不驚‧的口號來自我安慰‧
一直到1992年，中國國民黨的蘇起又捏做”92共識”，猶原繼續出騙步；
繼續佇配合中國的政策，用捏做的”92共識”欺騙全世界來壓迫台灣人！
佇2006年的228進前，蘇起承認”92共識”是伊捏做的‧
這的時陣，所有的台灣人是應該愛覺醒啦！
紀念228的意義，真濟少年人無瞭解，這毋是in無感情，毋是in的毋對‧
因為，以往的統治者中國國民黨政府，本身就是加害者，
當然驚予人知影真相，當然是禁止資料外洩，當然是禁止人講起‧
過去的戒嚴統治，實行黨禁、報禁，控制台灣人的言論自由、遷徙自由等等，
對台灣人的傷害和影響有若大？
正經予即馬的少年人想﹝勿會﹞到！感覺﹝勿會﹞到！
所以，咱愛緊來認識佮瞭解台灣的歷史，自近400年來，有文字記載的歷史，
咱大大細細一定愛去讀、來認識佮瞭解‧即馬，資訊透明，言論自由，佇逐位
的圖書館攏會當借到相關的參考冊‧
咱逐家愛緊來認識佮瞭解台灣的歷史，這嘛是紀念228上好的方式之一啦！